Dhubri, Jyliew:
Ki nongshong shnong jong ka thaiñ Dhubri ha ka 16 tarik mynta u bnai ki la ïoh ban bat ïa uwei u nongtuh bad na u ki la ïoh ban kurup ïa 2 tylli ki ‘air pistol’ bad katto katne tylli ki kuli bym pat shym la pyndonkam.
Kat kum ki jingïoh lum khubor la ïathuh ba ha ki khyndiat sngi kiba la leit noh, ka kyrteng jong uwei u nongtuh u ba la tip kyrteng kum u Gopal Mandal ka la saphriang jur ha ki thaiñ bapher bapher jong ka nongbah Dhubri bad ha kitei ki khyndiat sngi la ïoh jingtip ba ki la don bun tylli ki kam tuh kiba la jia ha katei ka thaiñ. Ki mar kiba la shah tuh ki kynthup ïa ki jingdon jingem jong ki paidbah, ki pisa na ki jaka mane Blei, ki battery jong ki ‘e-rickshaw’ bad kiwei kiwei.
Dei tad haduh ka 16 tarik mynta u bnai ba utei u nongtuh ba shyrkhei u la shah bat ha ki riew paidbah na ka kyntoit Wars No. 3. Hadien ka jingshah kem jong utei u nongtuh la ïathuh ba na ka liang ki bor pulit ki la leit mar mar sha katei ka kyntoit ban shimti noh ïa u.
Hadien ka jingshah kem jong u Gopal Mandal la ïathuh ba na ka liang ki paidbah ki la leit ruh ban khynra ïa ka ïïng sah jong u bad na katei ka ïïng ki la ïoh ban kurup ïa ki 2 tylli ki pistol, bun tylli ki kuli, ki tiar pynmynsaw, ki jingdih pynbuaid bad kiwie kiwei ki jingdon jingem. Na katei ka ïïng sah, ki paidbah ki la ïoh ruh ban kurup biang ïa ki tiar ki tar kiba utei u runar u la donkti ban rong tuh ha ki khyndiat sngi kiba la leit noh. Halor katei ka jingjia la ïathuh ba na ka liang ki bor pulit jong ka jylla ki la dep ban pynrung da ka mokotduma na ka bynta ban pynlong ïa ki jingtohkit kiba dang sah.
