Sydney, Jylliew:
Kawei na ki nongthaw aiñ ka Australia, ha ka Sngi Palei ka la pharep bad kynnoh ba ki don ki dkhot jong ka iing dobar thaw aiñ kiba ju ktah kti bad leh khlem-akor ia ka man ka por bad kumta ruh ka la ong ba katei ka jaka, kam long kaba shngaiñ ia ki kynthei ba kin trei bad ba kin iadon bynta hangtei.
Ha katei ka sngi, ka Lidia Thorpe ka la ong ba ha kane ka kynti kam banse ban phla ia ka jingshisha bad ia kaba la jia ia ka baroh shi katta, namar ba ki rangbah bad ki shynrang kiba iadei kam lang hapoh jong ka iing dorbar thaw aiñ, ki long kiba khlaiñ bor bad man ka por ki ju kren ia ki kyntien kiba ktah ia ka long rynieng jong ki kynthei, ki ju ktah ne bat ruh ia ki kynthei ha ka rukom ka bym dei bad ki ju pyni bor ruh ia ki kynthei namar ki tip ba ki don ka bor kaba kham khlaiñ ban ia ki kynthei.
Kumta, ka Thorpe ha katei ka Sngi Balang, ka la pharep bad phla ba ka la shah ktah kti bad shah leh khlem-akor ha uwei u dkhot ka iing dorbar thaw-aiñ ha kine ki khyndiat sngi ba la leit. Katei ka jingkynnoh jongka, ka long pyrshah ia u Davin Van hynrei utei u briew u la kyntait ia katei ka jingkynnoh jongka ha katei ka por.
Haba iakren bad ki lad pathai khubor, u Van u la pynpaw ia ka jingsngew lehraiñ bad kumjuh ruh ka jing bitar namar u la thet kti bad ong ba um shym don bynta ha kum kitei ki jait kam runar bad ba kitei ki jingkynnoh baroh ki long ki bym dei.
Ia ka kynhun u Van, la shah suspon noh ha katei hi ka Sngi Palei kaba bud namar katei ka jingshah pharep pyrshah ia u ha ka Sngi Balang.
Hynrei namar ka jing sheptieng, ka hap ban shu sngap jar khlem da pyntip eiei bad khlem da pynpaw jingsngew pher eiei kumba ju long man ka sngi.
Hynrei ka la ong ba namar ka kyrdan ba ka bat, kam banse ban ailad ia ki nongbud ba kin bud nadieng jongka kumba ju dei ka rukom. Katba, ka la ong ruh pat ba ka tip shai, ki don shibun ngut kiba la mad bad ngat ha kum kitei ki rukom hynrei ki bym nud ban ang ne ban phla namar ka jing sheptieng ioh kin hap ban duh noh wat ia ka kam kaba ki don, lane ba ka jingiadei kam jongki bad ki para ba iatrei lang kan thud ne pulom noh.
La ong ba naduh u snem 2021, ka la don ka jingbud nam haba iadei bad ka kam saiñ pyrthei hapoh ka iing dorbar thaw aiñ jong ka Australia, ha kaba ki don shibun kum kitei ki jingjia shah ktah kti bad shah leh khlem-akor ia ki nongtrei kynthei kiba long hi ki dkhot jong ka iing dorbar thaw aiñ.
Ha utei u snem, ka Brittany Higgins ka la kynnoh ba ki para dkhot ba iatrei lang badka, ki batbor ia ka hapoh ka jaka shongkai jong ka ophis treikam ki Myntri ka iing dorbar thaw aiñ hadien ba ki la pyndih buaid ia ka ha u snem 2019.
Nalor kane, ki don ruh sa kumba 5 tylli ki jingjia kiba kum kitei hi, ha kaba ki nongtrei kynthei lane ki dkhot jong ka iing dorbar thaw aiñ ki ju shah batbor bad shah ktah kti ha ki shynrang kiba iatrei lang bad kiba iadei kam badki.
Hadien ka jingwad bniah ha u snem 2021, la shem ba ka jingshah leh khlem-akor ki kynthei, ka jur bha hapoh ki iing dorbar thaw aiñ jong ka Australia. Kane ka long naduh ki nongthaw aiñ haduh ki dkhot ne ki nongtrei kiba shu iadon bynta lang hapoh jong ka iing dorbar thaw aiñ ruh kumjuh.
