Namibia, Jylliew:
Katkum ki khubor la ong ba ka Namibia ka la die noh haduh 40 tylli ki kuratia kum shi bynta ban tehlakam ia ka jingma kaba ap ia ki paidbah nongshong shnong na ka jingdon jong kitei ki mrad ha ka thaiñ Northeast jong ka Kavango bad ka Zambezi.
Kumta, ka tnat Ministry of Environment jong katei ka ri, ka la phah ia ka jingpynbna ‘Tender’ khnang ba kito kiba don jingmut ban thied ia kitei ki kuratia, ba kin phah ia ki kot- ki sla ba donkam naka bynta ban thep ia katei ka ‘tender’ sha katei ka tnat ba la bthah.
U Romeo, uba long u Lamphang jong katei ka tnat, u la ong ba bun na ki mrad kiba don hapoh ka ri, ki im shabar jong ki National Park bad kane ka long ka jingma kaba khraw ia ki paidbah nongshong shnong kiba don markhap bad kitei ki thaiñ ba don ki jaka ri mrad namar ka jingleit thombor jong kitei ki kuratia ia ki paidbah jong kitei ki shnong ba marjan.
Kumta la ong ba kitei ki nongthied kiba kwah ban shim ia kitei ki kuratia ruh ki dei ban pyntikna ba ki don ia ka jaka kaba biang ban ri bad ban set kut ia kitei ki mrad ha ka jaka ka ban ym ktah ia ki paidbah nongshong shnong. Nalor kata, kitei kiba thmu ban thied ki dei ban ioh ia ka ‘Permit’ na ki ri jong ki hi.
