Kohima, Jylliew:
Ki bor sorkar jong ka jylla Nagaland ha ka 18 tarik mynta u bnai ki la pyntip ba ki la don haduh kumba 43 ngut ki nongshong shnong na ka thaiñ Pongching, Longleng district kiba la kem pang hadien ba ki la bam ïa ki dohkha kiba la suba don bih.
Kat kum ka jingïathuh jong ki bor pulit, ki la pyntip ba ki la ïoh jingtip halor katei ka jingjia ha ka sngi Thohdieng kaba la dep bad ïa baroh kitei kiba la kem pang la leit ban rah sumar noh sha kawei ka hospital kaba marjan.
Hadien ka jingïoh jingtip la ïathuh ba na ka liang ki bor pulit hapoh ka jingïalam jong u Superintendent of Police (SP) ki la leit ban jngoh ïa kitei ki nongpang kiba shah sumar ha District Hospital (DH) Longleng na ka bynta ban pynlong ïa ki kam tohkit.
Kat kum ki jingïoh lum khubor la ïathuh ba kitei ki 43 ngut ki briew kiba la leit ban shah sumar hga katei ka hospital ki la ïoh ïa ka jingpang prie bad pynhiar. Na ka jingtohkit jong ki bor pulit, la ïoh jingtip ba ki nongshong shnong ki la leit ban thied ïa ki dohkha na kawei ka dukan bad ha ka sngi Thohdieng hadien ba ki la bam ïa ki, ki la kem pang bad dei tad haduh ka por janmiet ba la leit ban rah sumar ïa ki sha hospital.
Halor katei ka jingjia, la ïathuh ba na ka liang ki bor sorkar ka tnat Food Safety bad na ka Chamber of Commerce Longleng ki la leit ban jngoh ïa ki nongpang ha katei ka hospital ban pynlong ïa ki jingtohkit kiba sah. Na ka liang ki bor sorkar ki la leit ruh ban lum ïa ki nongmuna na ki dohkha ba kitei ki briew ki la shet bad kumjuh ruh na ki dohkha ba la die ha ïew da uwei u nongshong shnong. Ïa kitei ki nongmuna, la phah sha State Public Health laboratory na ka bynta ban pyndep ïa ki ‘test.’
Halor katei ka jingjia, na ka liang ki bor pulit ki la pynrung da ka mokotduma bad pynlong ïa ki jingtohkit bad ki la bthah ruh ïa ki nongshong shnong ka thaiñ ba kin ïatreilang bad ki bor pulit bad kumjuh ruh ba kin kiar na kaba pynsaphriang ïa kino kino ki khubor lamler.
