C. B. Iawphniaw
Kine ki lai tylli ki long ki mat kiba ktah bad kiba eh ba kane ka sorkar MDA – 2 ka iakynduh ban pynbeit bad pynhun ia u paidbah ka Jylla. Kata ruh ka shong ha ka jingstad ka sorkar bad ki nongmihkhmat ba la jied. Kumno ban pynbeit ia kine ki mat kiba jwat ban shu leh kyrkieh kam long bad ka shim por ban pynbeit halor kine ki mat.
Ka kam ia kajia pud ka long kaba eh ban pynbeit khlem ka jingmynjur ki trai jaka ki ar liang mamla. Ka kam pynkynriah ia ki kharmetor ruh ka long kaba eh ban shu pynkynriah ia ki khlem da pynioh ia ka hok jong ki ruh kiba la shong la sah la bun pateng ha kato ka jaka.
Ka kam pynbeit ia ka Reservation policy ruh kam long kaba suk ban shu pynkylla bad pynbeit hakdak ia ka bhah ki lok Garo kaba ki la ioh naduh u snem 1972. La bhah ia ki Garo 40 p.c. ia ki Khasi – Jaintia bad ki Garo ban ioh myntoi lang ia ka 80 p. c. khlem donkam shuh ban ia phiah namar ngi dei na kajuh ka Schedule Tribe status. Lehse kane ka formula ka lah ban pynhun ia baroh ki Khasi – Jaintia bad ki lok Garo ne Achik ban lait na ka jingsngew iapher jaitbynriew. Kane ka long ka jingiohi jongngi ki riew paidbah ba la long kum shipara ha ka Jylla.
