Novo Hamburgo, Jylliew:
Ki bor pyniaid jong ka Brazil ki la pyntip ba 13 ngut ki la khlad noh ha ka jingshah lynshop ka ‘erlangthari sha ka phang South jong ka Brazil bad kaba la pynlong ruh ia ki hajar ngut ki paidbah nongshong shnong ba kin phet bad buhai shnong noh sha ki thaiñ ba marjan bad katei ka jaka.
Ha ka Sngi Palei bad Sngi Thohdieng, bun tylli ki shnong jong ka Rio Grande do Sul ki la sakhi ia u slap bad ka lyer kaba jur, kynthup wat ia ka nongbah Porto Alegre bad la ong ba kane ka long ka jingjia kaba kham jur na ki jingthombor jong ki bor ka mariang ha kane ka ri.
La lap ruh sa 2 tylli ki metïap na ki bynta rud duriaw jong ka shnong Caraa, kaba long kawei na ki jaka kiba la shah lynshop jur tam eh ha katei ka erlangthari bad kaba la kyntiew ia ka jingdon kiba khlad na ka 11 ngut sha ka 13 ngut.
Katba, la ong ba ha katei ka Sngi U Blei, la ioh jingtip ba ki dang don sa 3 ngut kiba dang jah rngai na Caraa, hadien ba la pyntip ba ki don 20 ngut kiba ngat ha katei ka jingjia naduh ka Sngi Saitjaiñ.
Kumjuh ruh ka shnong Tramandai, ka dei kaba la shah lynshop jur bha ha ryngkat ka lyer kaba haduh 101.9 kilometre ha ka shi kynta (60km/hour).
Iwei napdeng jong kitei kiba khlad, i dei i khyllung ba dang 4 bnai.
Kumba 5,000 ngut ki paidbah nongshong kiba la shong khlem iing- khlem sem bad kumba 84,000 tylli pat ki longiing ki dei kiba la hap ban shong dum khlem bor ding tad haduh ka Sngi U Blei. Ki bor pyniaid ki la ioh ban pynkynriah noh ruh ia kumba 80 ngut ki briew na ka jaka kaba ap jingma bha na ki jing lynshop ki bor ka mariang.
Kumta la ong ba u Lat ka Grande do Sul, u Eduardo Leite, u la leit poi da ka liengsuiñ (helicopter) sha katei ka jaka kaba la shah ktah jur tam eh naka bynta ka jingleit jurip hadien ka jingwan lynshop jong katei ka ‘erlangthari.
Ha Caraa, utei u Lat u la leit ban jurip sha ka jaka ba ju pynlong jaka rieh tngen shipor ia kito kiba lanot kiba ju ngat ha kum ki kitei ki jingjia ha ki por ba la leit, ha kaba ki don da ki spah ngut ki briew kiba la pynshong bad ai jaka sah hangtei ia mynta shipor.
La ong ba ka jinglong- jingman ha Caraa ha kane ka por ka la shah ktah jur bha na katei ka jingjia bad kumta u Lat u la bthah ia ki bor ba dei khmih ba kin wad jingtip bad shim kyrteng ia kito ki longiing kiba la kham shah ktah jur bha.
U Leite u la iathuh ruh ba ki briew ka tnat pynlip ding ki la ioh ban pyllait im ia palat 2,400 ngut ki paidbah nongshong shnong ha kitei ki 2 sngi ba la leit.
