California, Jylliew:
Ka tnat European Mediterranean Seismological Centre (EMSC) ha ka Sngi U Blei ka la pyntip ba u jumai uba 6.4 magnitude ha ka thaiñ Gulf jong ka nongbah California.
Na ka liang jong ka tnat Civil Defence jong ka Mexico, ka la pyntikna ba ym shym don ki jing julor ne jing mynsaw na utei u jumai hynrei la bthah ia ki tnat ba dei khmih jong ki bynta rud duriaw naduh ki lieng bad ki thaiñ ba marjan ba kin phikir namar ki jingma kiba ap sawdong ia ki na ki bor ka mariang.
Utei u jumai u la pynkhñiuh ia katei ka thaiñ kumba 10 kilometre (6.21 miles).
Tang hadien khyndiat por jong ka jingwan utei u jumai, ka tnat Tsunami Warning System jong ka United States ka la pyntip ba kan ym don ka jingkhie ki jingat phyllung ne kino- kino ruh ki ‘erlangthari ha ki bynta rud duriaw jong ka thaiñ West ha US ha kane ka por.
Hynrei ha katei ka sngi la ong ba ki shu don katto katne ki jingat phyllung kiba rit bad ki bym don jingma ne ki ban ym don jingktah eiei ia ki bynta ruh duriaw jong katei ka thaiñ. Katba na ka liang jong ka US Geological Survey (USGS) pat ka la ong ba utei u jumai u dei uba 6.3 magnitude, ha kaba ka European Mediterranean Seismological Centre (EMSC) pat ka la pyntip ba utei u jumai u la poi 6.4 magnitude.
