Shillong, Jylliew 19:
Watla ka Lumdiengngan Sports Club ka la ïoh ban ïashim bynta ha ka Meghalaya State League (MSL), hynrei ïa kane ka kynhun ym don ba ithuh wat ki bor pynïaid ka Eastern Border Sports Association (EBSA).
Kat kum ka kyrwoh ba la pyllait khubor da u Bah S.N Syiemlieh, Acting Sirdar barim ka Dwara Nongtyrnem Sirdarship, la ong ba katei ka klob kaba la mihkhmat na ka EBSA, ka la ïakynduh kynduh jingeh haba ka leit ïashim bynta ha ka MSL mynta u snem.
Kane ka kynhun ka la shah pynngat ha ka Group-C (Mawkyrwat Zone) ha kaba ka la ïakhun pyrshah ïa ka lahduh jong ka MSL 2019 ka Shillong Lajong, kumjuh ia ka Pyndengrei SCSC, Mawten SC bad ka Riangdo YSCA.
Te kumta katei ka kynhun ka la khur ia ka jop shisien, iakhaid shisien bad shah rem arsien na ka bynta ban wan ha ka kyrdan san napdeng ki hynriew tylli ki kynhun ha kane ka group.
“Ha ka jingshisha la kumno kumno, ïa ka kynhun kaba la ïoh rung sha ka Meghalaya State League (MSL), ka la dei ban ïoh eiei ki lad jingïarap (honorarium). Hynrei kumba ka long ha kine ki snem kiba la dep, ka EBSA kam shym la leh eiei ruh em wat khyndiat ruh watla ka Lumdiengngan ka la ïoh rung ha ka MSL 2023,” la pynpaw ka kyrwoh.
“Ka Eastern Border Sports Association kam shym la leh eiei ruh em bad kane ka pyni ba kam don ka mon ban pynshlur lane ban ïarap ïa ka ban pynkiew shaphrang ïa ki klob na la ka jong ka thaiñ.”
Kumta kum uwei u riew rangbah uba ju ieit bha ïa ka phutbol, tang kawei nga kwah ban ong ba lada ka Eastern Border Sports Association lane kano kano ka synjuk ka kwah ban kyntiew lane pynshlur ïa ki klob kiba don hapoh ka thaiñ, ka dei ka kamram jong ka synjuk ba ka dei ban leh eiei namar ka long ka jingsarong ïa ka thaiñ hi baroh kawei.
“Dei ban don ki lad jingïarap ïa kino kino ki klob kiba ïoh rung sha ka Meghalaya State League (MSL) naba kam long kaba suk ki klob nongkyndong ban leit ïashim bynta ha katei ka lympung.”
