Imphal, Jylliew:
Ki bor sorkar jong ka jylla Manipur ha ki khyndiat sngi kiba la leit noh ki la pyntip ba ka sorkar jylla ka la don hapdeng ka jingpynkhreh ban pynbteng biang ïa ki lad ai jingpule sha ki khynnah kiba pule tad haduh ka klas VIII naduh ka 21 tarik mynta u bnai.
Kat kum ka kyrwoh ba la pyllait da ka Directorate of School Education, ka la pyntip ba ïa ki klas na ka bynta baroh ki khynnah pule tad haduh ka klas VIII yn pynbteng biang naduh ka 21 tarik. La pyntip shuh shuh ba hadien ka jingkhmih ïa ki jinglong jingman ha ka jylla, ïa ki lad ai jingpule na ka bynta ki klas kiba kham shaneng tad haduh ki kyrdan kolej yn sa pynbteng ynda la khmih bniah pin ba bin ïa ki jinglong jingman ha ka jylla. Na ka liang ki bor sorkar ki la pyntip ba la bthah ïa baroh ki zonal education officer kiba hapoh ka Tnat Pule Puthi ba kin shim ïa ki sienjam kiba janai halor katei ka rai ban pynbteng biang ïa ki lad jingpule na ka bynta ki khynnah skul.
Haba phai sha kawei pat ka khubor la ïathuh ba na ka liang u Myntri Rangbah jong ka jylla – N Biren Singh ha ki khyndiat sngi kiba la leit noh u la pynbna ba ka sorkar jylla ka la don hapdeng ka jingïakren ban pynjynsur noh ïa ka korphiw na ka 5:00 AM sha 6:00 PM khnang ba ki paidbah kin lah ban pynbteng biang ïa ki kam ki jam kiba ki ju ïatrei man la ka por bad kumjuh na ka bynta ban plie biang ïa ki jaka pule.’
Ha kawei ka liang la ïoh jingtip ba ki la don da ki hajar ngut ki khynnah pule kiba la hap ban mih noh na la ki jong ki ïing ki sem bad leit shong tngen ha ki ïing dara bapher bapher. Halor katei, na ka liang ka tnat Thoubal district Education Department ka la rai ban pynbiang ïa ki lad jingpule na ka bynta kitei ki khynnah kiba shong ba sah ha ki ïing dara kiba dang hap hapoh u pud u sam jong ka distrik.
Na ka liang ki bor sorkar ka tnat Pule Puthi jong ka jylla ki la pyntip ba ki don palat 6,000 ngut ki khynnah pule kiba la hap ban mih jyndat noh na la ki jong ki ïing ki sem hadien ka jingmih jong ki jingïakajia bad jingïaumsnam ha ka jylla Manipur.
Dang shen na ka liang u Myntri ka tnat Pule Puthi jong ka jylla – Bashanta Singh u la ïathuh ba na ka liang ka tnat sorkar ka la shim ïa ki lad ki lynti kiba kynsai tam na ka bynta ban bha ka miat jong ki khynnah pule. U la pyntip shuh shuh ba na ka liang ka tnat sorkar kan pynbiang ruh ïa ki tiar ki tar jingpule kum ki kot ki sla, ki khulom, ki jaiñphong skul bad kiwei kiwei na ka bynta kitei ki khynnah pule kiba la hap ban leit sah sha ki ïing dara.
