England, Jylliew:
Ka jingsdang jong ka jingiaid lynti da u khlur ialehkai Tennis na Bilat u Andy Murray ha ka kam ialehkai mynta ka aiom ka lah nang iai long kaba seisoh, ha kaba utei u rangialehkai u lah khur mynta sa ia ka trophy jingjop kaba ar ha ki ar taiew ha ka lympung ialehkai ba mynta ka Nottingham Open, na ka bynta ban iai bteng ia ka jingpynkhreh ba janai ka jong u na kawei pat ka lympung iakhun Grand Slam ka ba nsa long mynta ka Wimbledon.
Ka khubor ka iathuh ruh ba u Andy uba long u khur jingjop Grand Slam haduh lai sien ia kaba lah bud pat sa ka jingjop jong u ha ka Surbiton dang ha ka taiew ba lah dep, ha ka tei ka lympung ialehkai ba dang shu dep, u lah pynjanai ka rukom ialehkai ka jong u na ka bynta ban pynliem noh ia u rangialehkai na France u Arthur Cazaux da 6-4, 6-4 na ka bynta ban rah ia ka thong jingjop na ka lympung khlem da pynlehnohei wat tang kawei ka set iakhun.
Ka jingiaid lynti jingjop jong u Murray ha ki 10 jingialehkai ka pynlong ha u mynta kum uba biang tam eh ha ka kam ialehkai hadien ka jingwanphai biang ka jong u naduh ba u lah bat ia ka kyrdan ba nyngkong ha ka ATP ha u snem 2017.
