Shillong, Jylliew 19:
Ka Ri Syon N.E.F.C ka la khur ïa ka jingjop ha ka lympung ïalehkai Invitation Open To All Football Tournament 2023. Kane ka wan urlong hadien ba ka lah ban pynliem noh ïa ka Pahamrioh S.C da 3-1 kol.
Ha katei ka jingïakhun kaba la long ha ka Sngi Saitjaiñ ha madan Kurkalang kaba ha Bhoirymbong, ka Ri Syon ka la ïoh ban pynkhih jar nyngkong eh lyngba u Mark Austin Wanswet ha ka minit kaba 30 na ka bynta tam shi kol haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet, ka Pahamrioh ka la lah ban pynphai kylla shi kol lyngba u Sparkle Khongshei ha ka minit kaba 64. Hynrei hadien lai minit ka Ri Syon ka la ïoh ban thep biang ïa ka kol ba ar lyngba u Kevin Ranee bad ha shwa ban wai artad jong ka jingïalehkai ka la pynbud biang ïa ka kol ba lai lyngba u Orestar ha ka minit kaba 86 na ka bynta ban khur syndon ïa ka jingjop.
Kane ka lympung kan bteng biang ha ka 23 tarik ha kaba ka Oste Phi Oiñ B F.C kan ïakhun pyrshah ïa ka Lajong F.C.
