Shillong, Jylliew 19:
Ka MIT University of Meghalaya ka la rakhe ïa ka taïew ki samla ba la tip kum ka “Jovan Sports Week” ha ka Lah Sngi U Blei ha Nongthymmai Indoor Sports Complex.
Ha kane ka sngi la ïadon lang u Pro-Vice Chancellor u Dr. Debmalaya Bhattacharya kum u kongsan bad u la ïasam ruh ïa ki kyntien na ka bynta ka
Jovan Sports Week. U la ong ba ka ‘Jovan’ ka wan na ka kyntien samla kaba thew sha ki samla pule ka MIT University of Meghalaya.
U la ong ba kum ki samla pule ki dei ban ïadon bynta ha ka jingpule bad ruh ha ki kam ïalehkai shabar. Ka Jovan Week ka long ka lad na ka bynta ki samla pule ba kin ïoh ban ïashim bynta ha ki jingïalehkai shabar khnang ba kin ïoh ïa ka met kaba koit ba khiah, ka bor pyrkhat pyrdaiñ bad ruh ha ka bor mynsiem.
Ïa ki jingïalehkai jong kane ka taïew la phiah ha la ki jong ki kynhun (A, B, C & D). Ha ka Team C bad D ki kynthup ïa 30 ngut ki samla pule. Katba ha ka Team A bad B ki kynthup ïa ki nongtrei jong kane ka jaka pule.
Ha kane ka sngi la sdang ïa ka jingïalehkai Badminton ha ka singles bad doubles na ka bynta ki samla pule hapdeng ka Team-C bad Team-D. Hadien kata la pynbud pat sa ki nongtrei kiba ïashim bynta ha ka singles bad doubles jong kajuh ka jingïalehkai hapdeng ka Team A bad Team B.
