Shillong, Jylliew 19:
Ka ’thei ïalehkai karate ka Jylla, ka Saralin Rynghang ka la shah jied sha ka jingpyrshang (trial) na ka bynta ka Asian Games ka ban long ha Hangzhou kaba ha China.
Ïa kane ka jingpyrshang yn pynlong da ka Sports Authority of India bad ka Indian Olympic Association ka ban long ha ka sngi Ba-ar (20 tarik) ha IG Stadium kaba ha nongbah Delhi.
Kane ka ’thei ïalehkai kan ïashim bynta ha ka kyrdan ïalehkai jong ka 50 kg Individual Kumite.
Ha ka sngi U Blei ka Saralin ka la khur ïa ka takma ksiar ha ka Women Kumite 50 kg jong ka India Open International Karate Championship 2023 ha Talkotara Indoor Stadium, New Delhi.
Ha u snem ba la lah, ka la khur ruh ïa ka takma rnong ha ka National Championship kaba la long ha Chattisgarh bad ka la khur ruh ïa ka takma ksiar ha ka 2nd NE Olympic Games 2022 kaba la long ha ka nongbah Shillong.
Kat kum ka kyrwoh ba la pyllait da u General Secretary, Bah Ksan Kupar Warjri, u la ong na ka liang ka synjuk ka la ai khublei kitbok ïa kane ka ’thei ïalehkai ba kan ïalehkai bha ha katei ka jingpyrshang khnang ba kan ïoh ka lad ban mihkhmat ïa ka ri India sha katei ka lympung ka ban long ha China.
