Shillong, Jylliew 20:
Ka lahduh jong u snem ba la dep, ka Mawlai Sports Club lem bad ka Lumparing SC ki la khur ïa ka jingjop ba nyngkong ha ka Women’s Football League ba la pynïaid da ka Shillong Sports Association.
Ha kane ka jingïakhun kaba la long ha ka Sngi Ba-ar ha madan Third Ground Polo, ka Mawlai ka la lah ban pynliem noh ïa ka Ïasnohktilang Madanrting FC da 5-0 kol.
Ïa kine kol la thep da ka C. Nongtdu (10’), M. Nongrum (13’), W. Marweiñ (23’), M. Songthiang (29’) bad ka F. Sympli (58’).
Kumba ka paw ha kane ka jingïalehkai kaba nyngkong jong ka Group-B, ki ’thei ïalehkai ka Mawlai ki la lah ban ïakhun tyngeh naduh kaba sdang ha kaba kim shym la ailad ïa ki ’thei ïalehkai ka liang pyrshang. Wat ka ‘thei apkol jong ka Mawlai ha kane ka jingïalehkai ka la shu ïeng kai khlem da ïoh ktah ïa ka bol haduh kaba kut jong ka kylla step.
Haba phai sha kawei pat ka jingïakhun kaba ar jong kane ka group, ka Lumparing SC ka la jop da shiteng dorjon (7-0 kol) ïa ka Kharang SC.
Ka I. Marbaniang ka la ïoh ban thep marwei haduh saw kol ha ka minit kaba 34, 37, 41 & 67, katba ïa ki ar kol la thep da ka C. Khongwet (26 & 50) bad ïa kawei pat la thep da ka B. Synrem (70).
Kane ka lympung kan bteng biang ha ka Sngi Balang ha kaba ka Kick Start Academy kan ïakhun pyrshah ïa ka Lawei Smit SC ha ka por 2:30 noh phai sngi, katba ka Synroplang 77 ïa ka Maw U Tieng SC ha ka por 4:15 janmiet.
