Islamabad, Jylliew:
Ka tnat Railway ha Pakistan kam shym la lah ban siew ïa ka tulop jong ki nongtrei ha ka por ba ka dang jur bha ka jingkyrduh pisa, ha kaba kane ka la buh jingeh bad pynduh mynsiem ïa ki nongtrei, la ïathuh ka tyllong khubor.
“Ka Pakistan Railways Employees (PREM) Union (CBA) ka kynhun jong ki nongtrei ka la pynlong ïa ka jingïakhih ha Lahore namar ka jingbym ïoh tulop jong ki ha kaba ki la ong ba kane ka la pynduh mynsiem namar sa khyndiat sngi la wan ka jingrakhe ïa ka Eidul-Adha”, la ïathuh ka tyllong khubor.
U President jong ka Prem Union Lahore u Fiaz Ahmed Shahzad, u Secretary Khizar Hayat Baig, Senior Vice President Muhammad Jameel Malik, bad u nongpynïaid jong ka seng u Haji Aziz Madi ki la phah ka jingkyrpad sha u Myntri ka tnat Railway u Saad Rafique bad u CEO Arshad Salam Khattak ba kin ïakren bad pyntreikam noh ha kaba ïadei bad ka mat ban siew tulop sha ki nongtrei.
