Shillong, Jylliew 20:
Ka Jylla ka la duh noh ïa uwei na ki rangïalehkai phutbol barim, u Bah Shilling Roy Kharlukhi uba la khlad noh ha ka Lah Sngi U Blei ha ïingsah lajong ha Nongrah Pdengshnong.
U Bah Shilling u dei u rangïalehkai uba la mihkhmat ïa ka Jylla ha ka National Junior 1988 ba long ha Kerala bad Santosh Trophy 1993 ha Madras. U la long ruh u rangïalehkai jong ka Shillong Sports Association ha ka Senior Inter District Football Tournament ba la pynïaid da ka Meghalaya Football Association ha u snem 1997 ha kaba ka la long ka lahduh hapoh ka jingïalam u Bah Fullmoon kum u kapten.
Hadien ba la shongthait na ka jingïalehkai, u Bah Shilling u la ïarap ban shimti kum u Coach ïa ka Umpling SC bad kiwei ki kynhun ba ïashim bynta ha ka Shillong League.
Kumta na ka liang ka Shillong Sports Association ka pynpaw ïa ka jingsngewsih halor kane ka jingduh kaba khraw. Ka phah ruh ka jingsngewlem sha ki bahaïing hasem bad baroh kiba don ka jingïadei kaba jan bad une u khlur ka mynnor ha ka jingïalehkai phutbol ka dong ka thaiñ bad ka jylla hi baroh kawei.
Ïa ka met kaba sah jong u Bah Shilling yn tep ha ka Sngi Balang (21/06/23) ha Nongrah Pdengshnong.
