Ka saiñpyrthei ha Meghalaya ka long kaba kham pher na kiwei pat. Ka jingkylla kaba la wan ha Khasi Hills Autonomous District Council (KHADC) ha kaba u Chief Executive Member (CEM), u Bah Titosstarwell Chyne, u la shah pynhiar shuki ha ki MDC ka NPP bad Congress, ka pynpaw pyrthei ba ka seng kaba ïalam ïa ka Liang Pyrshah ha jylla, ka ïatreilang bad ka seng kaba ïalam ïa ka sorkar. Dang shen, u Lamphang ka Ïingdorbar Thawaiñ, u Thomas A Sangma, u la ai jingithuh ïa u Bah Ronnie V Lyngdoh, MLA ka Mylliem na ka seng Congress, ba un long u nongïalam ka Liang Pyrshah lane uta u ‘Leader of Opposition’. Kane ka shuki ka dei kaba donburom bad kaba kongsan bha ha ka synshar paidbah. Kumba ka long mynta, ka Liang Pyrshah ka don san ngut ki MLA ka Congress, san na ka Trinamool Congress bad saw ngut na ka Voice of the People Party (VPP). Ka dei kamram jong u nongïalam ba un lum un lang ïa kine ki seng bad ki MLA khnang ban pynkhlaiñ ïa ka Liang Pyrshah khamtam haba ka sorkar ka long kaba khlaiñ bad ba bun paid bha.
Hynrei, ka jingshah pynkhyllem jong u Bah Titos bad ka jingshah jied jong u MDC ka NPP na Sohryngkham, u Bah Pynïaid Sing Syiem, kum u CEM bathymmai, ka pyni ba pleng wat ka seng kaba ïalam ïa ka Liang Pyrshah ka lah ruh ban ïatreilang bad ka seng kaba ïalam ïa ka sorkar. Ka jingïatreilang hapdeng ka Congress bad ka NPP ban pynkhyllem ïa ka UDP ha District Council ka pyni shai ïa ka jingïaieid bad jingïadei kaba jan hapdeng ki nongïalam ka seng Congress bad ka NPP kam pher wat lada ka NPP ka dei ka dkhot jong ka National Democratic Alliance (NDA) ba la ïalam da ka BJP ha New Delhi. Ka saiñpyrthei ha kane ka jylla, kumba la kdew haneng, ka pher na kiwei pat bad kaba pynsah ha ka lyngngoh ïa kiba bun ba lang. Stad katba phi stad ruh, hynrei hakhmat ka rukom leh saiñpyrthei ha Meghalaya, phim pat long eiei!
Haba pynksan jubor ïa ka jingleit ïatreilang ka Congress bad ka NPP ha District Council, u Bah Ronnie u la ong ba kane baroh ka long ban ïada ïa ka jaitbynriew na ka jinglah ban wan ka jingsynshar Administrator hapoh ka Council. U Bah Ronnie u la ong ba lada ka jingsynshar u Lat kan wan lane ka Administrator’s Rule, mano shuh ban ïada, pynneh pynsah ïa ka riti dustur, ka hok halor ka khyndew ka shyiap jong ka jaitbynriew Khasi? Phewse u Bah Ronnie u la klet ba ka jaitbynriew Khasi ka la kyntait ïa ka NPP bad ka la jied da kiwei pat ki seng ha ka jaka jong ka ha ka ilekshon MLA kaba dang shu dep shen. Ka NPP ka la ïoh tang saw ngut ki MLA na ki konstitwensi kiba don hapoh u pud u sam jong ka KHADC. Kiba bun na ki MLA ka NPP ki la wan na Rilum Jaiñtia kaba hap hapoh ka jingkhmih jong ka Jaiñtia Hills Autonomous District Council (JHADC) bad na Rilum Garo kaba dei hapoh u pud u sam ka Garo Hills Autonomous District Council (GHADC). Hooid, ka jingkylla ka la wan ha ka KHADC, hynrei yn hap ruh ban sngewthuh ïa kane ka phang jong ka jingshah kyntait ka NPP na u pud u sam jong ka KHADC ha ka ilekshon MLA.
Ki hynriew ngut ki MDC ka Congress ki la ïatreilang bad ki khat-ar ngut ki MDC na ka NPP na ka bynta ban thaw ïa ka Executive Committee bathymmai ha KHADC bad ïa kane ka kynhun ba thymmai yn tip da ka kyrteng Khasi Hills Democratic Front (KHDF). Na ki hynriew ngut ki MDC ka Congress, lai ngut ki dei ruh ki MLA kiba kynthup ïa u Bah Ronnie, u Bah Charles Marngar na Mawhati bad u Bah Gabriel Wahlang na Nongstoiñ. Kane ka jingïatreilang ha District Council ka lah ban dei ka dak ka shin ba ka Congress ruh kan sa leit ïatreilang noh bad ka NPP ha ka sorkar jylla. Ym dei ban sngewphylla ïa kane namar ha u snem ba la dep, san ngut ki MLA ka Congress ki la leit kyrshan ïa ka sorkar Meghalaya Democratic Alliance (MDA) I bad ki la shah sospon syndon na ka seng.
Ka long ruh kaba sngewthamula shikatdei ba katba ka seng Congress ha ri thor ka ïakhun tyngeh pyrshah ïa ka BJP bad ïa ki seng kiba ïasnohkti lang bad ka, hangne ha Meghalaya pat ka long da khongpong. Lehse wat ki heh ka All India Congress Committee (AICC) ruh ki la dum lut ka buit ka stad. “Bad ki nongïalam na Meghalaya te ym lah ban leh eiei” ki lah ban long ki kyntien na ki heh ka AICC! Dang shen, ngi la ïohi kumno ka Congress ka la ïakhun dohïap ha ka ilekshon ha jylla Karnataka haduh ba ka la lah ban jop donburom bad pynshong ïa ka BJP ha ka Liang Pyrshah. Kan jin da la bha ïa ki san ngut ki MLA ka Congress ba kin iehnoh ïa kane ka seng bad ban leit pynïasoh beit noh sha ka NPP khnang ba kan ym long ka jingleh kamkai ïa ka deiti jong ka seng kaba ïalam ïa ka Liang Pyrshah.
