Lada ka jaidbynriew ka dei ban im bad iaid shaphrang donkam eh ba ka dei ban long kaba sngewthuh bad pyndonkam ia la ki khmat bad ka ja-bieng ban rai ban mut dur. U Blei u Trai Nongthaw u la ai ia ki khmat artylli bad kine ruh la buh ha ka rukom ba kin lah ban peit jngai. Hynrei ia ki mrad pat ki khmat jong ki, ki dem sha khyndew. U briew um ia pher na ki mrad namar u long hi u nongthaw kum u briew hynrei ka jingiapher ka long ba u mrad um don ka jingstad (nationality) hynrei u briew u don. Hangne shong ka jing-iapher kaba khraw tam hapdeng u briew bad u mrad. Kumta ka long ka ba shongnia bad kaba dei eh ba u briew u dei ban pyndonkam ia la ki khmat ban peit jngai bad ban pyndonkam bha ia kata ka jingstad kaba la bsiap ha u briew da U Blei.
Lada ngim leh kumta ngi ibein ia ka jingsbun bad jingieit jong u Blei uba la ai ia ngi ka jingstad kaba la palat liam bad kaba pynpher bak – ly – bak ia u briew ne u mrad. Wat la u mrad um don ka jingstad hynrei u don ka jingsngewthuh (instinct) bad u tip uno u kynbat uba bit ban bam bad ia uno pat ba un iehnoh.
Ha iing ha sem wat ha ba ngi bam ja, ngi da peit ngi da jied bha shuwa ban tian ha ka shyntur ioh ba u don u shyiap ne u shiah, ba ioh u sahkut ha u pdot. Katno tam ha ka kam iap kam im ka ri, ha ka kamai ka kajih bad ha ka khaii ka pateng, ngi dei ban long kiba phikir bad ki bym shu noh, pyrthuh ne bud ia kiwei khlem da sngewthuh ia ka dang ka duh. Lada ngi leh kumne khlem pep ka jingduhnong ka long kaba khraw ia ngi bad kumjuh ruh ba ka kam iap kam im ka ri kan pynmih ia ka jingtain bad jingran dien jong ka jaidbynriew. Namarkata to ngin ia kynmaw dngong ba na ka bynta ka jingbha shimet na ka bynta ka jingiaid shaphrang jong ka jaidbynriew donkam ba ngin long kiba sngewthuh da khan shwa ba ngin leh ne rai ia kano kano ka kam.Dei da kaba ngi leh kumne ngin lah ba leh ia la kamram ha la ka iing ka sem bad ban kyntiew ia la ka jaidbynriew.
[U Nongsain Hima (1968)]
