Guwahati, Jylliew:
Ka jingshlei um ha ka jylla Assam ka la nang ktah jur ïa ki nongshong shnong ha kaba haduh hynnin ka sngi lajan don 31,000 ngut ki briew kiba dang ïakynduh jingeh ha ki 10 tylli ki distrik, la ïathuh ki heh ba dei khmih.
Ka India Meteorological Department ka la pynmih ïa ki hukum sha kiba bun ki nongshong shnong kiba la shah ktah na ka jingshlei um ba ki la dei ban kynriah jaka noh naba la khmih lynti ïa ka jingnang bteng jong ka jinghap u slap uba jur ha kiba bun ki distrik jong ka jylla.
Katkum ka kaiphot ba la wanrah da ka Assam State Disaster Management Authority (ASDMA), la ong ba la don palat 30,700 ngut ki briew kiba la ngat ha ka jingshlei um ha Chirang, Darrang, Dhemaji, Dhubri, Dibrugarh, Kokrajhar, Lakhimpur, Nalbari, Sonitpur bad Udalguri distrik. Ka Lakhimpur distrik ka dei kaba la kham shah ktah jur ha kaba ki la don palat 22,000 ngut ki briew kiba la shah ktah na ka jingshlei um ha kaba la bud da ka Dibrugarh da palat 3,800 ngut bad ka Kokrajhar da 1,800 ngut.
