Islamabad, Jylliew:
Ka ri Pakistan ha ka 19 tarik mynta u bnai ka la don hapdeng ka jingïam briew kaba khraw hadien ba kawei ka lieng kaba kit ïa ki spah ngut ki phetwir ka la kylla bad ngam ha ka bynta jong kawei ka duriaw kaba don marjan bad ka ri Greece.
Kat kum ka jingïathuh jong ki phetwir kiba lait im na katei ka jingjia, ki la pyntip ba ki don palat kumba 750 ngut ki ‘riew phetwir kynthup ïa palat 100 ngut ki nong Pakistan ha ryngkat katto katne ngut ki nong Egypt, Syria bad Palestine kiba la shong da katei ka lieng ha ryngkat ka jingthmu ban leit sha ka dewbah Europe.
Kat kum ki jingïoh lum khubor la ïathuh ba katei ka lieng ka la kylla bad ngam ha ka sngi Balang ba la dep hajan ka Peloponnese peninsula.
Tad haduh ba la ïoh ïa kane ka khubor la ïathuh ba la ïoh ban pyllait im ïa kumba 100 ngut bad la ïoh ruh ban tam ïa 78 tylli ki metïap. Na ka liang ka tnat korbar ri jong ka Pakistan ki la pyntip ba napdeng ki 100 ngut kiba la ïoh ban pyllait im, 12 ngut ki dei ki nong Pakistan.
Ha ka sngi Saitjaiñ kaba la dep, na ka liang ka International Organization for Migration and the United Nations Refugee Agency (UNHCR) ka la pyntip ba watla ym shym la tikna haduh katno ngut ki briew kiba la shong da katei ka lieng, pynban la antad ba ki don hapdeng 400 haduh 750 ngut.
Shuh shuh ha ka Sngi U Blei ba la dep, na ka liang u Myntri Rangbahduh jong ka ri Pakistan – Shehbaz Sharif u la pynbna ban pynlong da ka sngi ïam briew (national day of mourning) ha ka Lah Sngi U Blei. U Myntri Rangbahduh u la bthah ruh ban thaw da ka ‘high-level committee’ ban tohkit bniah haloe katei ka jingjia.
Kat kum ki jingïoh lum jingtip la ïathuh ba na ka liang ki bor sorkar ki la ïoh ban kem ïa palat 12 ngut ki ryunar kiba ju donkti ha ki kam ban pynïaid iew beaiñ ïa ki briew (human trafficker) kiba ju shim da ki million tyngka ban phah ïa ki nongshong Pakistan shabar na la ka jong ka ri.
Na ka liang ki bor sorkar ka Federal Investigation Agency (FIA) ki la pyntip ba ha ki khyndiat sngi kiba la leit noh ki la ïoh ban kem ïa kumba 3 ngut ki runar, kynthup ruh ïa uwei uba donkti hakhmat eh ïa u ba la tip kyrteng kum u Sajid Mehmood.
Ïa u Mehmood la ïoh kem da ki bor sorkar ka FIA ha ka miet jong ka Sngi Thohdieng ba la dep na ka kad liengsuiñ Karachi katba u dang pyrshang ban leit phet rieh shabar na la ri.
Kat kum ki jingïoh lum jingtip la ïathuh ba ha ki 3 bnai kiba hakhmat jong u snem 2023, ki la don palat 400 ngut ki phetwit kiba la ngam jyllop ha ka duriaw Mediterranean.
