Shillong, Jylliew 20:
U Symbud Myntri Rangbah ka Jylla, Bah Prestone Tynsong ha ka Sngi Ba-ar u la ong ba ki paidbah ki dei ban husiar haba ki bam ïa ka doh masi, doh sniang bad dohkha.
“Ngi la dep bthah ïa 2 tylli ki tnad treikam – tnad dohkha-dohpnat bad tnad ka koit ka khiah,” la ong u Bah Tynsong haba jubab sha ki lad pathai khubor halor ka jingshimkhia ka Sorkar ïa ka jinglap ‘Formalin’ ha ki dohkha, ka jingpang at-sniehdoh ne ‘Lumpy Skin Disease’ ha ki masi bad ka jingpang ‘African Swine Fever’ (ASF) ha ki sniang.
U la ong ruh ba na ka liang kitei ki 2 tylli ki tnad treikam ki dang khmih bniah ïa kane ka bynta bad la pynmih ruh ïa ki jingpynshai sha ki paidbah ba ki dei ban long kiba husiar haba ïadei bad ka doh masi, doh sniang bad dohkha.
“Ngim ong ba nai thied shuh ïa kine ki jait doh, hynrei ngi la pynmih ïa ka jingpynshai paidbah ba ki dei ban husiar,” u la ong.
Kum ban shu kdew hangne, ka Meghalaya ha kine ki khyndiat taïew ba la dep ka la pynmih hukum ban khang ïa ka jingwanrah dohkha nabar ka Jylla hadien ba na ka jingpeit bniah ïa ki dohkha na kylleng ki distrik ka Jylla la shem ba ka don ka jingpyndonkam kaba jur ïa ka dawai ‘Formalin’ ha ki dohkha kaba long kum ka bih bad kaba ktah jur ïa ka jingkoit jingkhiah.
La ong ba na ki 40 tylli ki dohkha ba la phah peit bniah, la shem ba ha ki 30 tylli na kita ki dohkha ka don ka dawai ‘Formalin’. Ïa kane ka kaiphod la ai da ka Assistant Food Analyst jong ka Sorkar Jylla ha ka 6 tarik Jylliew, 2023.
Ha kawei ka liang, ka tnad Animal Husbandry & Veterinary ka Sorkar Jylla ka la ong ba ka jingdon jong ki masi kiba shah ktah ha ka jingpang at-sniehdoh ne ka ‘Lumpy Skin Disease’ (LSD) haduh ka Lah Sngi U Blei ka long 7640 tylli katba ka jingdon jong ki masi kiba suba ïap na katei ka jingpang haduh mynta ka long 72 tylli.
Shuh shuh kumba ka long, ka la don ruh ka jingïap jong ki sniang na ka ASF ha kylleng ka Jylla.
