Shillong, Jylliew 20:
Ka jingdon ki paidbah nongpeitkai phutbol ka la sdang ban kiew biang ha kane ka nongbah bad ïa kane lah ban sakhi na ka jingïakhun final jong ka Meghalaya State League 2023 ba la pynïaid da ka Meghalaya Football Asso-ciation ha ka sngi Saitjaiñ ha SSA Stadium, Polo.
Ha katei ka jingïakhun final da ki hajar ngut ki paidbah nongpeitkai ki la wan ban sakhi da la ki jong ki khmat na bynta ban ai jingkyrshan ïa la ka kynhun. Ha katei ka final jong ka MSL ka Rangdajied United FC ka la lah ban pynliem noh ïa ka Khlieh-mawlieh Youth Club da 1-0 kol na ka bynta ban khur ïa ka nam lahduh.
Kumba ka paw naduh shwa ba ka Shillong Lajong FC kan shah pynhiar kyrdan noh na ka I-League ha u 2019, ka jingdon ki paidbah ka la nang duna katba nang mih ki sngi bad wat ki bor pynïaid kim don jingmih eiei haba pynlong ïa ki lympung ïalehkai.
Hynrei dei naduh u snem ba la dep la sdang ban ïohi biang ïa ka jingbun ki paidbah nongpeitkai, khamtam ha ka jingïakhun hapdeng ka Mawlai SC bad ka Ryntih SC ha ka lympung ïalehkai jong ka Shillong Premier League.
Dangshen, la pynbna ba ka Jylla kan ïoh ban pynlong ïa ki katto katne ki jingïalehkai jong ka Durand Cup ha kane ka nongbah ha u Nailar mynta u snem bad ruh ka jingïoh rung biang ka Shillong Lajong FC sha ka I-League. Namar kata, la khmih lynti ba ka jingdon ki paidbah nongpeitkai kan nang kiew biang katba nang mih ki sngi.
Haba ïakren bad ki bor pynïaid ka MFA ki la pynpaw ïa ka jingkmen ban ïohi biang ïa ka jingtuid ki paidbah sha katei ka jingïakhun final bad ban pyndap ïa ki jaka shong ha SSA Stadium. “Ïa kum kine ki jingbun ki paidbah nongpeitkai ngi lah ban sakhi sa tang ha ki jingïalehkai phutbol ha nongkyndong, hynrei ngi sngewkmen ba mynta la sdang ban ïohi biang ha kane ka nongbah.”
