Itanagar, Jylliew:
Ki shipai ka kynhun Khonsa Battalion jong ka tnat Assam Rifles bad ki pulit jong ka Longding distrik ha Arunachal Pradesh ki la kem ïa lai ngut ki dkhot jong ka kynhun Yung Aung jong ka NSCN (K) ha kine ki ar sngi ba la leit, la ïathuh ka tyllong khubor. Ka kynhun ba la ïatreilang ka la ïoh ruh ban kurup ïa u drok haba la khmih bniah na kine kiba la shahkem.
Kine ki lai ngut ki la shahkem na ka shnong Wakka bad Khanu hajan ka khappud Indo-Myanmar ha ka por ba la don ka jingpyntreikam ha ka 17 bad ka 18 tarik, Jylliew, la ïathuh ka tyllong khubor. Ïa kane ka jingpyntreikam la pynlong hadien ba la ïoh jingtip halor ka jingdon jong ki dkhot ka NSCN-K (YA) hajan Wakka.
Kine ki briew ki la shahkem ha ryngkat ki song jong ki jingdih pynbuaid ha kaba la antad ba ka la kot sha ka T. 7 lak. Ka la don ka jingbuh jingujor ha kaba ïadei bad ka jingjia bad ïa kiba la shahkem la aiti sha ki pulit ka distrik na ka bynta ban bteng ïa ka jingtohkit, la ïathuh shuh shuh ka tyllong khubor.
