Gangtok, Jylliew:
Ki bor sorkar jong ka jylla Sikkim ha ka 18 tarik mynta u bnai ki la pyntip ba ki shipai ka Indian Army ki la lah ban leit shaw bad pyllait im sa ïa 300 ngut ki nongjngohkai pyrthei kiba la sahkut ha ka thaiñ Chungthang, North Sikkim na ka daw jong ka jingjia twa khyndew ha kylleng ki bynta jong ka thaiñ.
Na ka liang ki bor sorkar ki la pyntip ba bun na kitei ki nongjngohkai pyrthei ki dei kiba leit jngoh ïa ka thaiñ Lachung bad Lachen. Ki la pyntip ba dei ki shipai na ka Striking Lion Division, Trishakti Corps kiba la trei shitom miet bad sngi na ka bynta ban leit pyllait ïa kitei ki nongjngohkai pyrthei.
Ki la ïathuh ba baroh kitei ki 300 ngut ki la ïoh ban wanphai noh sha ka nongbah Gangtok ha ka 18 tarik mynta u bnai bad na ka liang ki bor shipai ki la pynbiang ruh ïa ka bam ka dih, ki jaka sah, ki dawai dashin bad kiwei kiwei ki jingdonkam.
