Bern, Jylliew:
Ki nongshong shnong ka Switzerland ki la pynlong ka jingthep vote ban pynlong aiñ halor kumno ban ialeh ban pynduna ka jingpynmih ia ka Carbon ha kaba katba dang iaid ki snem na ka daw jong ka jingjur palat ka jingpynmih ia ka Carbon ki lum thah ba paw jong kane ka ri ki la sdang ban um noh.
Shuh shuh ka kaiphod kaba la wad bniah ha kaba iadei bad kane ka iathuh ruh ba haduh u 2050 ngin ym lah shuh ban iohi ia ki Swiss Alps ki lumthah kiba itynnad bad kiba khring ia ki nongshong shnong na kylleng ki ri ka pyrthei ha kaba mynta mar shipawa jong kine ki lumthah ki la kylla um noh namar ka jingkylla ka suiñbneng.
Da ka Climate Law, la rai ban pynduna noh ka jingpynmih ia ka lyer jakhlia sha haw haw ban iada ia kitei ki lum thah bad u Matthias Huss uba long uwei na ki Swiss glaciologist ha ka jingiakren bad ki nongthoh khubor ula iathuh ba ula sngewsih bad sngewkhia mynsiem ban iohi ba ki lum thah ki la sdang ban kylla um bad kmen pat ha kawei ka liang ba ka la don ka jingiakren ban shim khia noh ha kaba iadei bad kane.
Haduh 42% ki nongshong shnong jong ka Switzerland ki la shim bynta ban thep vote na ka bynta ban ai jingkyrshan halor ka Climate Law. Kawei na ki daw halor ka jingkylla um noh ki lumthah jong ki Swiss Alps ka dei ruh namar ki katto katne de ki daw bad ka sorkar ka la ai jingmut ia ki nongshong shnong ba kin ialeh katba lah ban pyrshang iada ia ka mariang bad ban pyndonkam ruh ia kiei kiei ki bym don jingktah ia ka.
Bun ki nongshong shnong ka Switzerland ki la pynpaw ba kim kwah satia ban iohi ba ki lum thah kin um noh bad sngew ba kine ki lum thah ki long ka jingkyrmen ia kane ka ri kaba itynnad bad kaba la wan ban peitkai da ki million ki nongshong shnong ha ka shisnem.
