Shillong, Jylliew 20:
Kan long ka jingduh kaba khraw ïa ki paidbah nongkyrshan ka Argentina hadien ba ka India ka la kyntait ban pynlong ïa kane ka jingïalehkai hapoh kane ka ri da kaba aidaw halor ki jinglut jingsep ban pynlong ïa kane ka jingïalehkai paralok.
Kumba ka paw ka Argentina kaba dei ka lahduh jong ka World Cup 2022, ka la wan sha dewbah Asia ban pynïar ïa ka jingdei kaba jan bad ki paidbah ’riew phutbol jong ka pyrthei hi baroh kawei.
Ha ka jingwan sha kane ka dewbah Asia, ka Argentina ka la ïalehkai paralok pyrshah ïa ka Australia ha ka 15 tarik mynta u bnai ha Beijing bad ïa ka Indonesia ha Jakarta ha ka 19 tarik.
Kumta kane ka lahduh jong ka World Cup 2022 ka dang don sa ar tylli ki jingïalehkai paralok kiba ka thmu ban wan ïalehkai sha India bad Bangladesh kaba long shi bynta ban ai khublei kyrpang ïa ki paidbah kiba la ai jingkyrshan pura ha ka World Cup 2022 kaba la long ha Qatar.
Hynrei ki paidbah jong ka ri kin duh ïa ka lad ban sakhi da la ki jong ki khmat ïa u khlur ïalehkai ka pyrthei lem bad katei ka kynhun na ka daw ka jingkyntait ka India ban pynlong ïa kane ka jingïalehkai paralok.
U Secretary General ka AIFF, u Shaji Prabhakaran u la ïathuh na ka synjuk ïalehkai jong ka Argentina ka la pyntip sha ki bor ba dei khmih ka AIFF, hynrei u la ong ba kam long kaba suk ban pynlong ïa katei ka jingïalehkai namar hap ïoh jingkyrshan kaba khlaiñ ha ka liang ka jingbei pisa ïa kane ka jingïalehkai paralok.
“Ka Argentina FA ka la pyntip sha ngi na ka bynta ka jingïalehkai paralok, hynrei kam long kaba lah ban pynbiang ïa ki jinglut jingsep kiba bun. Kum kine ki wan jia hapoh ka ri, hynrei ngi donkam ka jingkyrshan kaba khlaiñ bha,” la bynrap u Prabhakaran.
Katei ka lahduh jong ka pyrthei ka long ka kynhun kaba dawa ha ki jinglut jingsep ha kylleng ka pyrthei hadien ba u Lionel Messi u la lah ban pynpaw ïalade kum u khlur ïalehkai ba kynsai ha ka pyrthei. Ka jingdawa jong ka Argentina ka long kumba $4-5 Million (32-40 klur). “Katei jingdawa ka Argentina ka long kaba heh palat bad ngi dang duna ka jinglut jingsep ha kaba ïadei bad ka phutbol hapoh ka ri,” la bynrap u Prabhakaran.
Kumba ka paw ka Argentina kam shym la kwah ban leit ïalehkai sha United States ha kane ka jingleit ïalehkai paralok.
U General Secretary u la ong ba kane ka dei ka jingïapher shibun shah lada ka India kaba don ha ka kyrdan ba 101 ha ka pyrthei kan ïakhun pyrshah ïa ka lahduh ha ka pyrthei bad kaba bat ïa ka kyrdan ba nyngkong.
“Kan long ka jingïapher shibun shah lada ka India ka ïalehkai,” la ong u Prabhakaran.
Wat la ka Argentina ka la wan ïalehkai sha India kham hashwa hadien ba u Nicolas Otamendi u la ïoh ban pyndei da ka khlieh ïa ka bol ba la shut na kyndong (corner) da u Lionel Messi ha ka jingïakhun hapdeng ka Argentina bad ka Venezuela ha Salt Lake stadium kaba ha Kolkata, hynrei mynta ka lah ban don ka jingsngew ïapher namar ka Argentina ka dei ka lahduh ha ka pyrthei.
