Auckland, Jylliew:
Ki bor pulit jong ka nongbah Auckland ha ka 19 tarik mynta u bnai ki la pyntip ba haduh 4 ngut ki briew ki la poi hospital hadien ba uwei u runar u la leit ban thombor da u sdie ha ki 3 tylli ki jaka bam kiba don ha Albany.
Na ka liang ki bor pulit ki la pyntip ba katei ka jingjia ka la jia ha ka por 9 baje mynmiet ha ka Lah Sngi U Blei mynta ka taiew. Halor katei ka jingjia, na ka liang ki bor pulit ki la kem noh ïa uwei u samla ba dang 24 snem ka rta.
Na ka liang ki bor pynïaid ka Auckland City Hospital ki la pyntip ba uwei napdeng kiba la ïoh ïa ki jingmynsaw u dang don hapdeng ka jingshah sumar ha katei ka hospital; katba ïa ki 3 ngut kiwei pat kiba la ïoh ïa ki jingmynsaw kiba malu mala la phah noh ïa ki sha ïing hadien ba ki la ïoh ïa ki jingsumar.
Kat kum ka jingïathuh jong uwei u briew, u la pyntip ba katei ka jingjia shah thombor ka la jia ha ka por ba ma u lem bad kiwei kiwei ki paralok ki dang don hapdeng ka jingbam ja miet.
U la ïathuh ba utei u runar hadien ba u la pyndep ïa ki kam beaiñ u la beh krad lut ruh ïa baroh ki nongbam jingbam ha katei ka dukan hashwa ba un leit ban thombor sa ha kawei ka jaka bam.
Halor katei ka jingjia, na ka liang u Acting Detective Inspector – Timothy Williams u la pyntip ba hadien ka jingtohkit la shem ba utei u runar u la leit ban leh ïa katei ka kam bymman marwei bad na ka liang ki bor pulit kim shym la suba ba kin don kiwei pat ki briew kiba ïatrei lang bad u. U heh pulit u la pyntip shuh shuh ba na ka liang ka tnat pulit ka la pynkhreh ban pynrung sa katto katne tylli ki mokotduma pyrshah ïa utei u runar.
Ki jaka bam kiba la shah thombor ha u runar ha katei ka miet ka kynthup ïa ka ‘Yues Dumpling Kitchen’, ka ‘Zhangliang Malatang’ bad ka ‘Maya Hotpot’.
