Tegucigalpa, Jylliew:
Ki la don kumba 41 ngut ki briew kiba la ïap hadien ba mih ka jingïakynad ha ka patok ba set ïa ki koidi kynthei ha Honduras, la ïathuh ka tyllong khubor hynnin ka sngi.
Kane ka jingïakynad ka la jia ha ka sngi Ba-ar ha Centro Femenino de Adaptacion Social, ka jaka ba la set tang ïa ki koidi kynthei kaba don shabar ka nongbah Tegucigalpa. Na kane ka jingjia la ong ba ka la don ka jingsyier ba ka jingïap jong ki briew kan sa nang kiew, la ïathuh ka tyllong khubor.
U nongaiktien jong ka Public Ministry u Yuri Mora ha ka jingïakren bad ki nongthoh khubor, u la ong ba ka jingïap jong ki briew kan sa lah ban nang kiew naba ka kynhun pyllait im ka dang bteng ban ai jingïarap ïa kiba la mynsaw, ha kaba u la bynrap shuh shuh da kaba ong ba ki la don kumba katto katne ngut ki briew kiba la ïap namar ka jingshah thang bad kiwei pat kiba la mynsaw na ka jingshah siat kuli.
“Ngin sa buddien halor ka jingjia bad halor ka jing-leh thurmur ha kane ka patok,” la ong ka Deputy Security Minister ka Julissa Villanueva, ha kaba ka la bthah ïa ki heh ba dei khmih ba ki la dei ban sdang ha ka ban pynlong ïa ka jingtohkit kaba bniah. Haduh ba la thoh ïa ka khubor ym pat tip shai ïa ka daw kaba la wanrah ïa kane ka jingïakynad kaba jur.
