Shillong, Jylliew 21:
Shi bynta ban ïasnoh kti lang ha ka ban rakhe ïa ka ‘9th International Day of Yoga’, ka skulbah jong ka North-Eastern Hill University ka la rakhe ïa kane ka sngi kaba kyrpang ha ka sngi Balang.
Ha kane ka sngi la ïadon lang u Vice-Chancellor kane ka skulbah u Prof. P. S. Shukla kum u kongsan. Ki la don 245 ngut ki nongïashim bynta naduh ki nonghikai, ki nongtrei, ki samla pule, ki para marjan bad ki bahaïing hasem jong ki dkhot kane ka skulbah.
Ïa kane ka prokram la sdang ha ka por 7 baje mynstep da kaba thang ïa ka sharak ha kaba la pdiang sngewbha ïa baroh ki nongïashim bynta da u Prof. D. K. Choubey, Chairman ka University Level Yoga Committee.
Haba ai jingkren ha kane ka sngi, u Vice-Chancellor kane ka skulbah u la ïai ban halor ka jingdonkam ban ïashim bynta lang da baroh. Kumta u la pynshlur ïa baroh ba kin shim bynta ha ka Yoga man la ka sngi khnang ba kin ïoh ïa ka met kaba koit ba khiah bad ruh ha ka bor pyrkhat pyrdaiñ.
“Ka jingim kaba koit ba khiah ka ïalam sha ka jingkhlaiñ ha ka bor pyrkhat pyrdaiñ bad kane ka pyni ïa ka jingpynmlien ban kilan met ha ka yoga naduh ki por kiba la leit”, u la bynrap.
Ïa kane ka prokram la pynïaid da ka Dr. Anamika Upadhaya, AYUSH Certified Trainer bad ka dkhot jong ka Art of Living.
Ha kane kajuh ka sngi, ka SPARK ruh ka la pynlong ïa kane ka prokram kaba kyrpang ha kaba ki khynnah ki la ïashim bynta lang halor ka phang ‘Yoga for Vasudhaiva Kutumbakam’ Humanity.”
Ïa kane la shim khia na ka bynta ban pynlong ïa kitei ki khynnah ba kin lait na ki jingkhuslai kum ki jingeh ha ïing ha sem, ki jingbiang ha ka ïoh ka kot, ki jingeh ha ka jinglong jingim bad kiwei.
Ka thong jong kane ka Yoga ka long ban ïarap pyllait na ki jingpang jingshitom bad ruh ban pynkhlaiñ ïa ka met ka phad.
Kane ka prokram ba pynlong da ka SPARK ka la long ka jingïarap kaba khraw ïa kumba 250 ngut ki khynnah.
Ka nongseng ha kajuh ka por ba dei ka President jong ka SPARK, ka Shima Modak ka la pynshai halor ki jingmyntoi jong ka Yoga. Kumta ka la kyntu ïa ki khynnah bad kumjuh ïa ki kmie ki kpa bad ka imlang sahlang ba kin kynthup ïa ka Yoga ha ka jingim kaba man la ka sngi khnang ba kin lait na ka jingban khia ha ka jingmut jingpyrkhat bad kiwei.
Ka Modak ka la pynbna ruh ba naduh ki khyndiat snem ba la leit, ka Yoga ka la kylla long kum kawei na ki bynta kaba man la ka sngi ha ka pule puthi ha kaba ki khynnah ki la ïoh ban kilan met kumba 10 minit man la ka sngi ha shwa ban sdang klas.
Kane ka pyni ba ki khynnah ki ïoh ban lehkmen da kaba kilan met ha ka yoga bad ka long ruh ka jingmyntoi kaba khraw ha ka koit ka khiah.
Shuh shuh ka Institute of Bio-resources and Sustainable Development (DBT-IBSD), kaba dei ka tnat pule jong ka Biotechnology kaba hap ha ka Ministry of Science and Technology jong ka sorkar pdeng, ka la rakhe ïa kane ka sngi kaba kyrpang ha 6th Mile, Upper Shillong.
Mynta u snem ka phang pdeng jong ka Yoga Day ka long ‘Yoga for Vasudhaiva Kutumbakam’ kaba mut ka jinglong kawei ha ka pyrthei, kawei ka longïing bad kawei na ka bynta ka lawei.
Ha kane ka prokram la ïashim bynta lang da ki nongtrei, ki nongwad bniah, ki technical bad kiwei. Ïa kane la shim khia da u Prof. Pulok Kumar Mukherjee, Director ka IBSD.
