U Nongsaiñ Hima (1962)
Katkum ka Riti – Synshar (Constitution) kiba ka Ri India ka pyndonkam ha kane ka Jingsynshar – Paidbah (Democracy), U Lat (Governor) jong kano kano ka jylla (State) um lah ban shu sngap kumto halade, hynrei u dei ban pyntip sha U Khlieh – Duh (President ) jong ka Ri India lada u shem ha kano kano ka por ba ka synshar-khadar ha ka Jylla kam lah shuh ban long kaba iaid beit iaid ryntih ha ka rukom kumba ka ju iaid (kata namar ba don katto katne ki daw kiba kiba pynmih ia ka jingkynrum-kynram).
Khnang ban kham shai, shisien ba ka synshar-khadar ha Jylla ka la dkoh bad ka la tlot bor (kata namar ba ka jingbym suk – bymhun, ka jingiakynad bad kiwei pat ki kynrum – kynram ki trei jur hapoh ka Jylla), U Lat jong kata ka Jylla u dei shisyndon ban pyntip shaphang kata ha Khlieh – Duh jong ka Ri India, khnang ba un leh ei ei. Bad kumba ka dei ban long, hadien ba U Khlieh Duh jong ka Ri India u la shem ba ka jingsuk jinghun kam don shuh bad ba ka jingpyntrei kam ia ki rule ki ain ba la thaw kam lah shuh ban iaid ryntih hapoh ka Jylla baroh kawei, une U Khlieh Duh u ban knieh noh ia ka bor synshar na ka kti jong kito kiba ju bat ia ka bad u dei ruh ban pynsahngeh noh ia ka Dorbar Thaw Ain jong ka Jylla tad haduh ba ka jingiaid beit jong kiei kiei kan da mih hadien ka jingiapynbeit thymmai. Ka jingkhein sting jong U Khlieh – Duh ia la ka jong ka kamram halor kane ka bynta, kan pynmih shibun ki jingeh ia ki bor synshar bad ia ka Ri India hi baroh kawei.
Khnang ban kham shai, shisien ba U Khlieh – Duh jong ka Ri India u la shem ba ka jingsynshar khadar hapoh ka Jylla ka don hapdeng ka jingma(kata namar ba ka jingbym iatrei lang bad namar ba ka kynja jingklumar ka don), une U Khlieh – Duh um banse khlem da pynbna ba un aiti noh ia ka jingsynshar – khadar jong ka Jylla ha ka Sorkar India ba kan nang pyniaid tad haduh ba ki jingkylla kin da mih hadien ka jingiapynbeit kaba thikna katkum ka jingdawa jong ka kam. Ka jingbym suidniew jong U Khlieh – Duh bad jong ki bor synshar kiba ha khlieh ia kane ka bynta kaba hap hapoh ka jingpeit jong ki, kan kylla long ka kabu ksiar ia nongshun bad ia ki bor ialeh pyrshah kiba kynthup ruh ia kito kiwei pat ki Seng – Sain – Pyrthei kiba ialeh ban ioh bat ia ka bor synshar jong ka Ri India da kaba iai pyrem bad da kaba iai pynpaw pyrthei ia ka jingkheinsting, ia jingbymtbit bad ia ka jingbymlah pyniaid kam synshar khadar jong ka Seng Sain pyrthei kaba ju bat ia ka bor synshar.
Da kaba bud dien ter – ter ia kitei haneng, ngi lah ban sngewthuh ba lada ngi ki Riewlum ngi ieng skhem ha ka nongrim kaba la pynieng, ka por kan sa poi ha kaba ki Assamia bad kiwei pat ki bor pynwit bad kiwei pat ki bor pynwit kin nym lah shuh ban pynwit ia ka lynti jong ngi. Khnang ban kham shai lada ki District Rilum jong ngi kim treh shuh ban ia don bynta lang ha ka Dorbar Thaw Ain bad lada ngi ki Riewlum ngi iai pynpaw ruh ba ngi pyrshah ia ka jingleh donbor halor jong ngi, ka por kan sa poi ha kaba ka synshar – khadar ha ka Jylla Assam kan sa long kaba dkoh bad ka bym lah shuh ban iaid beit katkum ki nongrim jong ka Jingsynshar Paidbah. Bad shisien ba ka la long kumta, ki Assamia kim nym lah shuh khlem da mad ia u soh jong ka jingkynrum kynram uba ki la pynsan baroh shi katta ne U Khlieh – Duh jong ka Ri India hi um base shuh khlem da leh ei – ei kumba la kdew haneng.
Kumba ka long, naduh ba sdang haduh mynta ngi ki Riewlum ngi don borabor hapdeng ka jingsyier bad hapdeng ka jingshah khniot bein. Hynrei ynda la poi pat kata ka por, ka jinglynga ne ka jingsyier kan sa wan hap kylla halor jong ki Assamia. Khnang ban kham shai, ka kynrum-kynram ha ka synshar-khadar ne ka jingsaham jong U Khlieh – Duh jong ka Ri India ban knieh noh ia ka jingsynshar jong ka Jylla Assam baroh kawei, kan pynlong ia ki Assamia (kiba ju bat bor synshar) ban lynga ne ban bynnud namar ba kaba kum kane kaei – kaei kaba ktah wat ia ki District Ri – thor jong ki hi ka wan mih tang namar ba ki Riewlum kim trei iasnoh kti lang.
Bad bunsien ba ka la long kumta ki Assamia bad kiwei pat ki bor pynwit kin nym lah shuh ban pynwit ia ka lynti jong ngi. Ha kaba kut, ki Assamia kin kylla long pynban kum ki nongpynialah Hima Rilum namar kin iohi ba ka jingkhlad noh jong ki District Rilum, kan pyllait iaki na ka jingsuhsat ne kan pynlong ia ki ban nym duh ia ka bor synshar-khadar halor lade, kata halor ka District Rithor la jong.
