Jowai, Jylliew 21:
Ka lympung ïalehkai District Level Inter School Subroto Cup Football Tournament 2023 ba la pynïaid da ka shlem treikam District Sports Officer (DSO), West Jaiñtia Hills District ka la nang jam shaphrang ha ka sngi kaba ar ha Kiang Nangbah Stadium, Ladthadlaboh Jowai.
Ha ka sngi Balang, ka Jowai District Presbyterian Secondary School, RC Eve SS, Mang Hai Ryum SS, Marian Hills HSS, Jowai Presbyterian HSS bad Jowai Govt. UP & RMSA ki la khur jingjop ha ka kyrdan ïalehkai Under-17 Boys bad Under-14 Boys.
Ha ka jingïakhun jong ka kyrdan Under-17 Boys, ka Jowai District Presbyterian Secondary School, Ïalong ka la pynliem noh ïa ka Muthlong Pioneer Secondary School lyngba ka tie-breaker da 7-6 kol.
Ka RC Eve Secondary School ka la pynliem noh ïa ka Seiñraij Higher Secondary School da 2-0 kol. Ka Mang Hai Ryum Secondary School ka la jop ïa ka Police Public Secondary School da 2-0 kol.
Ka Marian Hill Higher Secondary School ka la pynliem ïa ka Jaiñtia Higher Secondary School da 1-0 kol, kumjuh ka Jowai Presbyterian Higher Secondary School ka la pynliem ïa ka Trangblang Govt. UP & RMSA da 4-1 kol.
Katba ha ka kyrdan Under-14 Boys, ka Jowai Govt. UP & RMSA School ka la pynliem ïa ka Police Secondary School lyngba ka tie-breaker da 3-2 kol.
