Shillong, Jylliew 21:
Ka Meghalaya State Olympic Association ha ryngkat bad ki nongkilan met jong ka pyrthei (Olympic Sports Community) kin rakhe ïa ka Olympic Day 2023 da kaba pynlong ïa ka jingïakob mareh ‘4th Edition Shillong 10K Run 2023’ ha ka 24 tarik mynta u bnai.
Ïa kane ka jingïakob mareh yn sdang naduh ka por 6:30 mynstep na J.N Stadium (Gate 1), Polo Ground, Shillong sha Polo Bazar -4th Furlong – B.K. Bajoria Junction -B.K. Bajoria – PGT College – Shillong Commerce College – Shillong College – Don Bosco Square -Laitumkhrah Police Point – Laitumkhrah Police Beat House – Fire Brigade – St. Edmund’s School – Dhankheti – Malki Point – Barik Point – Civil Hospital -State Central Library – Meghalaya Secretariat – DC Office -Governor House -sha Wards Lake – CM Bungalow – Polo Tower – Polo Bazar bad kan kut ha JN Stadium.
Katei ka synjuk ka la pynkhreh ruh ïa ki khusnam na ka bynta ki nongjop kiba kynthup ïa T. 7,000/-, T. 5000/-, T. 3,000/- ïa kiba wan nyngkong, ba-ar bad balai. La pynkhreh ruh ïa ki khusnam consolation ïa kiba wan basaw haduh baphra ha kaba kin ïoh mar T. 1,000/-, lem bad ïa san ngut ki Veteran (50+years).
Kumta na ka liang ka MSOA ka la khmih lynti ïa ki paidbah bad khamtam ki samla ba kin wan ïashim bynta ha ka jingrakhe ïa kane ka International Olympic Day.
