Shillong, Jylliew 21:
Ka kynhun ïalehkai phutbol ka ri ka la khur ïa ka jingjop ha kaba sdang ïa ka SAFF Championship 2023 hadien ba ka lah ban pynliem noh ïa ka Pakistan da 4-0 kol ha ka Sngi Balang ha Sree Kanteerava Stadium kaba ha Bengaluru.
U Sunil Chhetri ha kane ka jingïakhun u la khur ïa ka hat-trick hadien ba u ïoh ban thep lai kol bad ïa kawei pat la pynbud da u Udanta Singh na ka bynta ban khur ïa ki lai dor-thong (point) na ka Group-A.
Kumba ka paw naduh kaba sdang ka jingïalehkai kaba nyngkong jong kane ka group baroh ar ki kynhun ki la pyrshang ban ïakhun tyngeh, hynrei ka India ka lah ban pynpaw ïa ka jingtbit ha la ïing da kaba ïoh ban pynkhih jar lyngba u Chhetri ha ka minit kaba 10.
Utei u kapten u la pynbud biang ïa ka kol ba ar lyngba ka penalty ha ka minit kaba 16 na ka bynta ban pynlong ïa katei ka lahduh jong ka Hero Intercontinental Cup ban tam 2-0 kol ha ka kylla step.
Hadien ba la bteng biang ïa ka jingïakhun jong ka kylla miet baroh ar kynhun ki la ïai bteng ban ïakhun tyngeh bad khamtam eh ka Pakistan kaba dang donkam ban pynphai.
U Chhetri u la khur syndon ïa ka hat-trick hadien ba u ïoh ban thep biang ïa ka kol kaba lai lyngba ka penalty ha ka minit kaba 74.
Kane ka jingïoh ban thep kol utei u kapten ka la pynlong ïa ki rangïalehkai ka ri ban nang ïoh mynsiem ha ka rukom ïalehkai. Ha shwa ban kut ka jingïalehkai, ka la thep biang ïa ka kol kaba khatduh lyngba u Udanta Singh ha ka minit kaba 81 na ka bynta ban khur syndon ïa ka jingjop.
Haba phai sha kawei pat ka jingïakhun jong kane ka group, ka Kuwait ka la pynliem noh ïa ka Nepal da 3-1 kol.
Ha ka kylla step ka Kuwait ka la ïoh ban pynkhih jar nyngkong eh lyngba u Khalid El Ebrahim ha ka minit kaba 23 bad ïa kawei pat la thep da u Shabib Al Khaldi ha ka minit kaba 41.
Kane ka kynhun ka la pynbud biang ïa ka kol kaba lai lyngba ka penalty ba la shut da u Mohammad Addullah Daham ha ka minit kaba 65. Hadien 2 minit ka Nepal ka la ïoh ban pynphai kylla shi kol lyngba u Anjan Bista ha shwa ba kan mad ïa ka jingshah rem.
Ka India kan pynkhreh ïa ka jingïakhun ba ar pyrshah ïa ka Nepal ha ka 24 tarik, katba ka Pakistan ïa ka Kuwait.
Kiwei pat ki kynhun kiba don ha ka Group-B ki long ka Bangladesh, Bhutan, Lebanon bad Maldives.
