Shillong, Jylliew 21:
Wat la ka lympung ïalehkai Meghalaya State League 2023 ka la poi sha kaba kut myn ha ka sngi saitjaiñ ha kane ka nongbah, hynrei kiba bun ki klob kiba ïashim bynta ha kane ka lympung ki la pynpaw ïa ka jingbymhun namar la shu pynlong tang dep rukom.
Kane ka lympung ka don haduh 71 sien ïakhun kaba kynthup ïa 66 tylli ki jingïakhun kiba la pynlong ha baroh saw tylli ki zone kum ha Shillong, Mawkyrwat, Jowai bad Tura, kumjuh ïa 4 tylli ki jingïakhun semi final (home and away) bad ka final kaba la pynlong ha kane ka nongbah.
Kumba ka paw na ki saw tylli ki group, tang mar kawei ka kynhun kaba wan ha ka kyrdan ba hakhlieh ki ïoh ïa ka lad ban rung sha ka semi final.
“Kane ka MSL mynta u snem ka shu long kum ka jingpyndep rukom namar ha ka jaka ban ailad ïa kumba phra tylli ki kynhun ba kin ïakhun shwa ïa ka quarter final, hynrei la shu rah beit sha ka semi final ” la pynpaw ki katto katne ki klob kiba ïashim bynta ha kane ka lympung.
“Wat la ngi la ïoh rung sha ka MSL, hynrei ngim da sngewhun ïa ka rukom pynïaid ka MFA namar ngi ïoh ban ïalehkai tang mar san sien ïakhun. Lada ka MFA ka wanrah lang ïa ka jingïalehkai quarter final kan long ka jingïarap ïa ki klob ba kin ïakhun tyngeh na ka bynta ban ïaknieh rung sha ka semi final,” ki la bynrap.
Kat kum ki khubor ba la ïoh lum la ong ba ka jingpynlut na ka bynta kane ka lympung ka la kot sha ka T.1 klur tam.
Ka lahduh ha kane ka lympung ka ïoh pdiang ïa ka khusnam kaba T.5 lak, kaba wan ba ar T.3 lak, ki kynhun ba rung semi final ki ïoh mar T.1 lak, katba ki 25 tylli ki kynhun kiba ïoh rung sha ka MSL ki ïoh mar T.1 lak nalor mar T.1 lak ïa ki synjuk ïalehkai kiba lah ban pynlong pura ïa ki lympung ïalehkai.
“Kum ki nongpynïaid klob ngim da sngewhun halor kane ka rukom pynïaid ka Meghalaya Football Association namar la shu leh ha la ka mon, khlem da khot lang ïa ki nongpynïaid klob ba kin ïoh ban phylliew jingmut lang hashwa ban shim ïa ka rai,” ki la bynrap.
Lah ban sakhi ruh ba ha kaba ïadei bad ka final, ka MFA kam shym la pynbeit lypa ïa kino na ki nongkitkam ba kin ïoh bynta lang ban leh burom ïa ki nongshah khot sngewbha. Pynban la shu khot hak-dak bad la don uwei u rangbah na ka daw ka jingshitom bym lah ïaid stet, u la hap ban poi slem bad sa khyndiat u la jan duh ban leh burom kawei na ki nongshah khot sngewbha.
