Aizawl, Jylliew:
Ki la don palat 1500 ngut ki khynnah na Manipur ka jylla kaba la shah ktah jur na ka jingïakynad ban leit pynrung kyrteng ha kiba bun ki skul kiba don ha Mizoram, la ïathuh u heh sorkar jong ka tnat pule puthi ha ka jylla.
U Director jong ka tnat ka pule-puthi jong ka jylla Mizoram u Lalsangliana u la ong ba la shu pyllait ei khlem donkam siew bai rung na ka bynta ka jingwan rung skul jong ki khynnah kiba na ka jylla Manipur ha ki skul sorkar. Kum ka jingsngewkhia halor ki jinglong jingman ba la jia ha Manipur, ïa ki khynnah la ailad ba kin rung skul khlem da donkam ban wanrah ïa ki kot sakhi ne kiwei pat ki kot ki sla kumba ju donkam na ka bynta ka jingpynrung kyrteng, u la ong.
Ha kaba ïadei bad kane, na ka liang u Home Commissioner jong ka Mizoram bad u Secretary u H Lalengmawia u la pynpaw ka jingkyrmen ba ka sorkar jylla kan sa ïoh shuh shuh ki jingïarap bad ki jingkyrshan na ka sorkar kmie ban ai ka jingïarap sha palat 11,800 ngut ki briew ki bym don jaka shuh ban sah kiba la phet shnong na Manipur.
