Shillong, Jylliew 21:
Ka Maw U-Tieng SC ka la sdang da ka jingjop ha ka lympung ïalehkai Women’s League 2023 ba la pynïaid da ka Shillong Sports Association. Kane ka wan urlong hadien ba ka lah ban pynliem noh ïa ka Synroplang 77 da 5-0 kol ha ka sngi Balang ha madan Third Ground, Polo.
Ha kane ka jingïalehkai ka J. Narlong ka la khur ïa ka hat-trick da kaba ïoh thep ha ka minit kaba 12, 19 & 36, katba ïa kiwei pat la thep da ka R. Dkhar (48) bad ka D. Syngkli- (61) na ka bynta ban pynlong ïa katei ka kynhun ban khur ïa ki lai dor-thong na ka Group-B.
Haba phai sha ka jingïakhun na ka Group-A kaba la long kham hashwa hapdeng ka Kick Start Football Coaching Centre bad ka Lawei Smit SC ki la ïasam mar shi dor-thong hadien ba kim shym la lah ban thep kol haduh kaba kut ka jingïalehkai.
Wat la ka ’thei ap kol jong ka Lawei Smit SC ka la ïoh ïa ka kabu kaba biang ban shut ïa ka bol lyngba ka Ionaris Khongsit hashwa ban kut ka jingïalehkai, hynrei ka ’thei ap kol jong ka Kick Start ka Patricia Lyngdoh Nonglait ka la lah ban pyllait na ka jingshah thep.
Ki jingïalehkai jong ka Group-A ha ka sngi Palei kin long hapdeng ka Umpling SC pyrshah ïa ka PFR Football Academy ha ka por 2:30 noh phai sngi bad ka Mawkriah West SC ïa ka Laitkor SC ha ka por 4:15 janmiet.
