Shillong, Jylliew 22:
Kan dei ka sien kaba nyngkong eh ba ïa ka lympung 132nd Durand Cup yn pynlong ha ki saw tylli ki jaka kiba kynthup ïa ka nongbah Shillong. Ha kane ka lympung la pynkhreh ruh ban pynlut haduh T. 89 lak na ka bynta baroh ki khusnam.
Ïa kane ka lympung yn sdang naduh 3 tarik u Nailar haduh 3 tarik u Nailur. Nalor ka Shillong, kiwei pat ki jaka ban pynlong ïa kane ka lympung ki long ha Kokrajhar, Kolkata bad Guwahati.
Kin don haduh 28 tylli ki klob ki ban ïashim bynta ha kane ka lympung. 12 tylli na kitei ki dei kiba shim bynta ha ka Indian Super League (ISL), 11 tylli na ka I-League bad 5 tylli na ka kynhun shipai.
Ïa ka Durand Cup la ju pynlong manla u snem bad la sdang nyngkong eh ha Shimla ha u snem 1888. Ïa kane ka lympung kaba la rim bha la pynlong da ka All India Football Federation (AIFF) lem bad ka Durand Football Tournament Society (DFTS).
Ka Bengaluru FC ka dei ka kynhun kaba la bat ïa ka nam lahduh ha u snem ba la dep hadien ba pynliem ïa ka Mumbai City FC ha ka final. Ha kawei pat ka liang ka East Bengal FC, ka dei ka klob kaba la khur ïa ka nam lahduh haduh 17 sien.
Wat la ka JN Stadium ha Polo ka dang don hapdeng ka jingmaramot, hynrei ka SSA Stadium lane ka SAI Training Centre ki lah ban pynlong ïa ka Durand Cup, kaba long ka sien kaba nyngkong eh ha kane ka nongbah.
Ha Kolkata yn pynlong ha Vivekananda Yuba Bharati Krirangan kaba lah ban ngiam haduh 85,000 ngut ki paidbah nongpeitkai. Ha Kokrajhar yn pynlong ha SAI Special Area Game Centre, kaba lah ban ngiam 10,000 ngut ki paidbah bad ka Indira Gandhi Athletic Stadium ha Guwahati ka lah ban ngiam haduh 30,000 ngut ki paidbah nongpeitkai.
Ki kynhun ïalehkai ISL ki ban ïashim bynta ha kane ka lympung ki long ka Bengaluru, East Bengal, Chennaiyin, Goa, Hyderabad, Jamshedpur, Kerala Blasters, Mohun Bagan SG, Mumbai City, NorthEast United, Odisha & Punjab. Na ka I-League ki long ka Aizawl, Churchill Brothers, Delhi, Gokulam Kerala, Mohammedan, Rajasthan United, NEROCA, Real Kashmir, Shillong Lajong, Sreenidi Deccan bad ka TRAU. Na ka liang ka kynhun jong ki shipai ki long ka Army Green, Army Red, Indian Air Force, Indian Navy bad ka Assam Rifles.
