Jowai, Jylliew 22:
Ka shlem treikam u Superintendent of Police, West Jaiñtia Hills District ka la pynlong da ka jingïalehkai paralok (Friendly Match) ban pynphriang ïa ka khubor halor ka jingma na u drok bad ka jingkhaii be-aiñ.
Ïa ka jingïalehkai la pynlong hapdeng ka West Jaiñtia Police bad ki Referee jong ka West Jaiñtia District Sports Association ha Kiang Stadium ha ka sngi palei.
Ïa ka kynhun jong ka West Jaiñtia Police la ïalam da u Additional SP, u Dr. V.D Sangahiwot Rymbai bad ïa ka kynhun jong ki rephri la ïalam da u Kermi Pasi.
Ha kane ka jingïakhun ka West Jaiñtia Police ka la pynliem ïa ki rephri ka WJDSA da 3-2 kol. Ïa ki kol jong ka West Jaiñtia Police la thep da u Sientremi Rongi ha ka minit kaba 54 & 68 bad u Dr. V.D Sangahiwot Rymbai ha ka minit kaba 74. Katba ïa ar tylli ki kol jong ki rephri ka WJDSA la thep da u Shiningstar Rymbai ha ka minit kaba 30 bad 78.
Ha kane ka sngi la donlang ruh u Officer In-charge ka Jowai Police Station u S. Mannar bad kiwei kiwei.
