Jerusalem, Jylliew:
Ka khubor na Israel ka iathuh ba ki shipai jong kane ka ri kila ioh ban pyniap ia 3 ngut ki lehnoh ha ki bynta jong ka West Bank ha kaba kane ka dei hadien ba ki shipai ka Israel ki la hiar thma ia ka West Bank da ki drone.
Ka Israel Defence Forces (IDF) ha ka sngi Balang jong ka taiew ka la hiar thma ia ki bynta jong ka West Bank kiba la riehtngen da ki lehnoh bad ka jingioh ki shipai ka Israel ban shim ia ka jingim jong kitei ki 3 ngut ki lehnoh ka long ka jingjop bakhraw ia kane ka ri kaba thmu ban rat dyngkhong bad ban pynduh pyndam noh syndon ia ki kam pyntriem ki lehnoh.
Shuh shuh ki lad pathai khubor ki iathuh ba kitei 3 ngut ki lehnoh kila riehtngen ha ka shnong Jalaman kaba don hajan Jenin kaba ha West Bank bad ka jingiap jong ki ka dei ruh hadien ba ki drone Missile ba la siat da ki shipai ka Israel ki laleit hap ha ka kali ba shong kitei 3 ngut. Wat hadien ka jingshah ther namding bad roket ka West Bank na ka por sha ka por ha ki shipai ka Israel pynban kane kam shim la don kano kano ka jingktah ia ka West Bank.
Dang ha u Rymphang ki shipai ka Israel ki la leit ruh ban thombor ia ki bynta jong ka West Bank ha kaba haduh 11 ngut ki briew kila duhnoh ia la ka jingim bad kumba 100 ngut pat ki la mynsaw na katei ka jingjia kaba sngew shyrkhei.
