Aizawl, Jylliew:
U Chief Secretary barim jong ka Mizoram u Lalnunmawia Chuaungo ha ka sngi Ba-ar u la leit ban pynïasoh bad ka seng Congress kum shi bynta ban nang pynkhlaiñ shuh shuh ïa ki rukom pyntreikam ha ka seng hashwa ban don ka ilekshon Assembly ha ka jylla.
Ka ilekshon ban jied ïa ki 40 ngut ki dkhot jong ka Mizoram kan sa long kham hadien ha une u snem.
Ha ryngkat u Chuaungo, ki la don kumba 771 ngut ki dkhot kiba thymmai, kynthup ïa u nongpynbna ba pawkhmat ha ki TV u Vanneihthanga Vanchhawng bad u nongthoh khubor u Lalremruata Renthlei ki la shah pynrung dkhot hapoh ka seng Congress da u President ka seng u Lalsawta ha ka por ba don ka jingïalang ha Aizawl.
Ha ka jingai jingkren ha katei ka jingïalang u Lalsawta u la ong ba ka seng kan ym pyndonkam da ka pisa na ka bynta ban ïoh ïa ka jingjop ha ka jingïakhun ïa ka ilekshon Assembly ka ban sa wan.
