Imphal, Jylliew:
Na ka jingbthei bom jong ka kali, ki la don kumba lai ngut ki briew kiba la mynsaw ha ka jingjia kaba la jia ha ka sngi Balang ha kum kane ka por ba dang bteng ki jngïakynad ha Manipur kaba la neh lajan ar bnai, la ïathuh ka tyllong khubor.
Na ka liang u Myntri ka sorkar kmie uba dei khmih ïa ka tnat ki kam pohïing, u Amit Shah u la khot da ka jingïalang jong baroh ki seng ha New Delhi ha ka sngi Saitjaiñ na ka bynta ban ïakren halor ki jinglong jingman kiba la ktah ïa ka jylla Manipur.
Ka jingbthei bom ka la jia ha ka por 7:30 janmiet ha kaba ïa u bom la buh ha ka kali SUV ha Kwakta kaba don ha Bishnupur.
Kumba la ïathuh da ki heh pulit, la ong ba la suba ba ki la don kumba arngut ki briew kiba la ïap bad saw ngut kiwei pat ki la mynsaw ha ka jingjia kaba la jia, hynrei haduh ba la thoh ïa ka khubor ym pat lah ba pyntikna katno ngut kiba la mynsaw bad kiba la ïap ha ka jingjia ki don, namar ka jingtohkit ka dang ïaid shakhmat.
