Guwahati, Jylliew:
Ki jinglong jingman kiba la mih na ka jingshlei um ha Assam ki la nang jur ha ka sngi Balang ha kaba ki la jan don 1.2 lak ngut ki briew kiba la shah ktah jur ha baroh ki 10 tylli ki distrik, la ïathuh ka tyllong khubor.
Kumba la ïathuh ka kaiphot kaba la wan na ka Assam State Disaster Management Authority (ASDMA), la ong ba ki la don palat 1,19,800 ngut ki briew kiba la shah ktah jur na ka jingshlei um ha Baksa, Barpeta, Darrang, Dhemaji, Dhubri, Kokrajhar, Lakhimpur, Nalbari, Sonitpur bad Udalguri distrik.
Ka Nalbari ka la long ka distrik kaba la shah ktah jur ha kaba ki la don kumba 45,000 ngut ki briew kiba la shah ktah na ka jingshlei um, ha kaba la bud sa ka Baksa da palat 26,500 ngut ki briew bad ka Lakhimpur da palat 25,000 ngut ki briew, la bynrap ka kaiphot.
Ki bor sorkar ki la pyntreikam ïa 14 tylli ki jaka ba la buh ha ki san tylli ki distrik, ha kaba ki la don kumba 2,091 ngut ki briew kiba la ïoh jaka sah shipor, bad nalor kine, ki la don sa kumba 17 tylli ki jaka ba la buh na ka bynta ban sam bad pynbiang ïa ki jingdonkam jong ki lanot ha ki san tylli ki distrik.
Ki shipai ka tnat Army, ki shipai ka sorkar kmie, ka kynhun NDRF, SDRF, Fire & Emergency Services (F&ES), ki bor sorkar, ki nongtrei mon sngewbha bad ki nongshong shnong ki la don bynta ban pyllait im ïa kumba 1,280 ngut ki briew kiba sahkut ha kylleng ki jaka.
Kumba ka long mynta, la ong ba ki dang don sa kumba 780 tylli ki shnong kiba dang don hapoh ka jingshlei um ha kaba ki la don ruh ki jingthung ha ki lyngkha ba 0,591.85 Hectares kiba la shah pynjulor ha kylleng ka jylla Assam, la ong ka ASDMA.
