Kohima, Jylliew:
U Myntri Rangbah jong ka Nagaland u Neiphiu Rio u la pynpaw ka jingkyrmen ba ki Class ha ka Medical College kaba nyngkong ha ka jylla kin sa sdang ha ka por jong ka jingsdang ki jingpule jong une u snem ba mynta. U Rio u la kren ïa kine ki kyntien ha ka por ba u la leit ban jurip ïa ka Nagaland Institute of Medical Science and Research (NIMSR). U la ai ka jingïaroh ha kaba ïadei bad ki rukom pyntreikam bad ka jingshna ïa ka Medical College ha Nagaland. U Myntri Rangbah jong ka Nagaland u la pynpaw ka jingkyrmen ba ki nongshong shnong jong ka jylla kin sa ïoh jingmyntoi na ka jingdon jong kane ka jaka pule. U Rio u la pynpaw ruh ka jingsngewnguh na ka bynta ka jingwan shakhmat jong ka sorkar Japan halor ka jinglah jong ka ban bei tyngka na ka bynta kane ka Hospital kaba don 400 jingthiah ha NIMSR lyngba ka JICA.
U Myntri Rangbah ka Nagaland u la bynrap shuh shuh da kaba ong ba ka jingmang da kumba 80 tylli ki jaka ha ki MBBS Seat na ka bynta ki khynnah pule na ka jylla ha kiwei pat ki Medical Colleges la weng noh. “Namar kata ka jingsdang ïa ki Class ha ka Medical College kaba nyngkong ka la dei ban long ha u bnai Naitung haduh Nailar,” la ong u Rio.
