Banjul, Jylliew:
Hadien ba 70 ngut ki khynnah ki la duh noh ia la ka jingim na ka jingdih ia ka dawai jyrhoh kaba la pynmih na India. Kumta ka sorkar Gambia ka la shim khia ban peitngor bad ban kiar noh shwa shipor ban thied dawai na India khnang ban lait na kano kano ka jingjia ba sngewsih.
Ka jingduhnoh jong 70 ngut ki khynnah ia la ka jingim tang namar ka dawai jyrhoh ba pynmih na India ka la pynlong ia ki nongshong shnong kane ka ri ban phah ia ka sorkar ba kan tuklar bad shim khia bha halor kane bad la iathuh ba ki khynnah kiba la khlad namar kane ka jingjia ki dei kiba dang hapoh ka 5 snem. Ki khubor na Gambia ki iathuh ruh ba kine ki khynnah kiba la khlad ki la shah ktah ha ki bynta jong u khyllai bad ka sorkar Gambia ka sngew ba ka dei ka bynta jong ka ban peitngor bad kumjuh ruh ban phah test ia ki dawai kiba la wan poi na India naduh ka 1 tarik u Naitung.
Ka India ka la paw kum kawei na ki ri ka pyrthei kaba jur bha ka jingkhaii ia ki dawai na Africa bad hadien jong katei ka jingjia ba sngewsih ha Gambia bun ki ri ka Africa ki la pynsangeh noh shwa ban thied dawai na kane ka ri.
Ka Gambia kaba la shaniah bha ha ka India ban pynpoi ia ki dawai dashin sha kane ka ri ka la thoh shithi sha u Rajeev Singh Raghuvanshi uba dei u India’s Drug Controller General ba dei ban ailad ia ka Quntrol Laboratories ba kan test shwa ia ki dawai kiba ka phah ha Gambia nangne sha khmat bad lada kam don kano kano ka jingma ka Gambia kan sa sdang biang ban thied dawai na ka India.
Shuh shuh la phah ruh ia ka Quntrol Laboratories ba naduh ka 1 tarik jong u bnai ban wan kan shim khia ban test bha ia ki dawai jyrhoh ha shwa ban phah sha kane ka ri khnang ba yn lah ban ai jingiada ia ki khyllung khynnah.
Ka Gambia ka dei kawei na ki ri barit tam eh jong ka Africa bad ka long ha kajuh ka por ka ri kaba duk bha. Kane ka ri ka don kumba 2.5 million ki nongshong shnong bad kane ka ri ka ap ruh ia ka jingiarap jong ka World Bank na ka bynta ban pynpoi ia ki dawai dashin bad ia ki jingdonkam jong ka namar ba kam shim don kano kano ka jingmih.
Ka jingduhnoh jong ki 70 ngut ki khynnah ia ka jingim ha u snem ba la leit ka long kaei kaei kaba la ktah bha ia ka tnat ka koit ka khiah jong kane ka ri bad ha ka kaiphod ba la pynmih da ka WHO la lap ba ka dawai jyrhoh ba la pynpoi da ka India sha Gambia ka dei kaba la khleh lang bad ka lethal toxins ethylene glycol bad diethylene glycol kiba la pyndonkam bha ha ki brake jong ki kali.Shuh shuh ka WHO kala pynshai ruh ba ka jingdon jong kitei ki jingkhleh ha ki dawai jyrhoh kam long satia kaba biang ia ki briew ba kin dih naba ka don ka jingma bakhraw.
