Kohima, Jylliew:
U Myntri Rangbah jong ka Nagaland u Neiphiu Rio u la pynpaw ïa ka jingsngewkhia halor ka jingïakynad kaba dang bteng haduh mynta ha Manipur.
U Rio u la ong ba u da sngewsih halor ka jingjia jong ki jingïakynad bad ka jingduh jong kiba bun ki mynsiem briew bad kumjuh ki jingshah pynjulor jong ki jingdon jingem ha ka jylla ba marjan.
“Ka jingduh jong ki mynsiem briew, ki jingshah pynjulor jong ki jingdon jingem, bad ki jingpynjulor ïa ki ïingmane bad ki jaka mane blei ki la dei ban kut noh. Nga da kyrpad jur ïa ki hynmen para kynthei bad shynrang ba kin ïeng tylli na ka bynta ban wanrah ïa ka shongsuk-shongsaiñ,” la ong u Rio.
Haduh mynta ki la don palat 100 ngut ki briew kiba la duh ïala ka jingim na ka jingïakynad kaba la mih hapdeng ka kynhun jait bynriew Meitei bad Kuki ha Manipur ïa kaba la sdang naduh u bnai ba la lah.
