Kampala, Jylliew:
Ki bor sorkar jong ka ri Uganda ha ka 22 tarik mynta u bnai ki la pyntip ba ki dkhot jong kawei ka kynhun lehnoh ki la leit ban thombor ïa kawei ka skul kaba don ha ka thaiñ shaphang sepngi jong ka ri Uganda bad na katei ka jingleit thombor la ïathuh ba ki la don haduh 41 ngut ki briew kiba la khlad (khambun ki khynnah skul) bad 6 ngut kiwei pat kiba la shah rahbor ha katei ka kynhun lehnoh.
Kat kum ka jingïathuh jong u nongaiktien ka tnat shipai jong ka ri Uganda – Felix Kulayigye u la ïathuh ba ki runar ki la leit ban thombor da ki tiar pynmynsaw kum ki wait bad ki sdie, bad wiang ding ruh ïa kawei ka jaka sah jong ki khynnah skul.
Kat kum ka jingïathuh jong ki heh shipai ka ri, ki la pyntip ba ha katei ka sngi ki la don haduh kumba 20 ngut ki dkhot jong ka kynhun lehnoh Allied Democratic Forces (ADF) kiba la leit ban thombor ïa ha Lhubirira secondary school. Ki bor shipai ki la pyntip shuh shuh ba ka ADF ka dei kawei na ki kynhun lehnoh kaba don ïa ka jingïatehlok bad ka kynhun ISIS.
Kat kum ka jingïathuh jong ki bor sorkar, ki la pyntip ba katei ka skul kaba la shah thombor ha katei ka sngi ka dei kaba don ha kawei ka thaiñ khappud kaba markhap bad ka ri Congo bad bun na ki khynnah pule ki dei kiba dang hapdeng ka 13 bad 18 snem ka rta. Na ki 41 ngut kiba la khlad, 39 ngut ki dei ki khynnah pule bad 2 ngut kiwei pat ki dei ki nongshong shnong ba marjan bad katei ka skul.
Kat kum ka jingïathuh ki bor sorkar, ki la pyntip ba ha ka por ba jia katei ka jingjia, ki don haduh kumba 62 ngut ki briew ha katei ka skul (khynnah skul bad ki riew paidbah).
Halor katei ka jingjia, na ka liang ka United Nations ka la pypaw ïa ka jingpynrem kaba jur bad ong ruh ba ïa ki runar kiba donkti ha katei ka kam bymman dei ban pynshitom ïa ki kat kum ki kyndon jong ka aiñ. Na ka liang u Secretary General Antonio Guterres u la dawa ruh ïa ka kynhun lehnoh ba ka dei ban pyllait noh ïa ki 6 ngut ki khynnah skul kiba la shah rahbor bad dawa ruh ba dei ban don ka sienjam ban pynkhlaiñ ïa ki kam pahara ha ki thaiñ khappud kiba hapdeng ka ri Uganda bad ka ri Congo.
