Shillong, Jylliew 23:
Ka Mawlai SC bad ka Lumparing SC ki la bteng ïa ka jingjop kaba ar ha ka Group-B jong ka lympung ïalehkai Women’s League ba la pynïaid da ka Shillong Sports Association ha ka sngi Thohdieng ha madan Polo.
Ha ka jingïakhun kaba nyngkong, ka Mawlai kaba long ka lahduh ha u snem ba la dep ka la pynliem noh ïa ka Kharang SC haduh 7-1 kol.
Ha kane ka jingïalehkai ka Makrisha Songthiang ka la ïoh ban thep ar kol ha ka minit kaba 3′ & 47, katba ïa kiwei pat ki kol la thep da ka Napaleroiki Lytan (29′), Aibaplielad Skhemiew (31′), Charlinda Nongtdu (66′), Ideibanri Kharpan (68′) bad ka Baiahun L Nongbri (70′). Ka Kharang SC ka la lah ban pynphai kylla shi kol lyngba ka Damansani Kharsahnoh (41′).
Haba phai sha kawei pat ka jingïakhun kaba ar, ka Lumparing ka la pynliem noh ïa ka Ïasnohktilang Madanrting FC da 8-0 kol. Ka In-ri La-i-dor Khongthaw ka la ïoh ban thep haduh saw kol ha ka minit kaba 54′, 57′, 61′ & 66′. Ka kapten jong kane ka kynhun ka Sidaris Khongwet ka la ïoh ban thep ar kol ha ka minit kaba 5’ & 22’ lem bad ka Ïaphishisha Marbaniang (33′, 50′).
Kumba ka paw ki ’thei ïalehkai ka Ïasnohktilang kim shym la lah ban ïalehkai bha bad ki la shem jingeh ban ïoh bol.
Wat la kitei ki kynhun kiba khur jingjop kiba la kamai mar 6 dor-thong (point) na ki ar sien ïakhun, hynrei ka Lumparing ka la ïoh ban lamkhmat na ka Group-B lyngba ka jingïapher kol ïa ka Mawlai.
Na ka liang ka Tournament Committee jong ka SSA ki la pynbna ba kane ka lympung ïalehkai ki kynthei kan bteng biang ha ka 3 tarik u Naitung. Ha katei ka sngi ka Laitkor SC kan ïakhun pyrshah ïa ka Kick Start Football Coaching Centre ha ka por 2:30, katba ka Lawei Smit SC ïa ka PFR Academy ha ka por 4:15 janmiet. Kine baroh ar tylli ki jingïakhun ki dei na ka Group-A.
