Washington, Jylliew:
Ki heh jong ka Coast Guard ki la ong ba ka jingwad ïa ki san ngut ki briew kiba la jah hadien ka jingleit ngam shapoh duriaw la pynkut noh ha ka sngi Palei hadien ba la lap ïa ki lyngkhot lyngkhai ba la pra jong ka jhad ngam um (Submarine) ba ki shong.
Ka jingleit wad kaba jur ha ki bynta ba mar shapdeng jong ka duriaw Atlantic ka la long naduh ka sngi ba ym shym la ïoh shuh ban ïakren bad ki ha ka por ba ki la don ha ka jhad ngam um halor ka jingthmu jong ki ban leit khmih bniah ïa ka jhad Titanic.
Na ka liang ki heh ka kynhun kiba la leit wad ïa kine ki san ngut ki briew ki la phah ka jingsngewlem sha ki bahaïing jong ki kum ha kane ka por ba ki la ïohmad ïa ka khubor jong ka jingsngewsih. Ïa ka Unmanned Deep-sea Robot ïa kaba la pyntreikam ha ka jhad jong ki nong Canada la lap ba ka la pait la pra ha ka step jong ka sngi Palei. Kane ka jhad ngam um kaba kine ki san ngut ki la shong ka la mih ha ka step jong ka sngi U Blei.
Kine ki san ngut ki kynthup ïa u heh spah ka ri Britain bad u nongwad bniah u Hamish Harding, 58; u heh spah ka Pakistan u Shahzada Dawood, 48, bad u khun jong u uba dang 19 snem ka rta, u Suleman, kine baroh arngut ki dei ki nongshong shnong jong ka Britain, u nongwad bniah ha duriaw bad u riewshemphang shaphang ka jhad Titanic u Paul-Henri Nargeolet, 77 bad u Stockton Rush, uba long u Chief Executive jong ka OceanGate.
