Imphal, Jylliew:
Ka la don ka jingïasiat kaba markylliang hapdeng ki ‘riewkieng atiar bad ka kynhun ki shipai na tnat Assam Rifle ha ka step jong ka sngi Palei, hadien ba ki runar ki la thmu ban siat pathar ïa ki nongshong shnong ha Imphal West distrik kaba ha Manipur, la ïathuh ki heh ba dei khmih.
Ha kane ka jingjia, ki la don kumba arngut ki shipai Assam Rifle kiba la mynsaw ha ka por ba la don ka jingïasiat kaba markylliang, la ïathuh u heh shipai. “Ha ka por 5 baje mynstep jong katei ka sngi, ka kynhun jong ki runar ka la siat ïa ka shnong N Boljang kaba don ha Imphal West.
Na ka liang ki shipai ki la pynphai kylla ïa ka jingsiat, bad kumba ka long mynta ka jinglong jingman ka la hap hapoh ka jingshah tehlakam,” la ïathuh u heh shipai.
“Ka jingpyntreikam ka dang ïai bteng. La lap ïa kawei ka suloi INSAS na katei ka jaka. Kane ka suloi ka dei kaba la lute na ka jaka treikam jong ki pulit,” la ong u heh shipai.
