Shillong, Jylliew 23:
Ka jingïakob mareh ‘10k Olympic Day Run’ ba la pynïaid da ka Meghalaya State Olympics Association (MSOA) kan long mynta ka step jong ka sngi Saitjaiñ ha ka por 6 baje ha madan Polo.
Ïa kane ka jingïakob la plie lad lang na bynta ki shynrang, kynthei bad kito kiba la don palat 18 snem ka rta. Kane ka jingïakob mareh ka la ïoh ruh ka jingkyrshan na kiba bun ki kynrem ki lyndan ban ai mynsiem ïa ki nongwan shim bynta ba kin ai ïa kaba bha tam bad ban pynrung ïa ka mynsiem jong ka Olympic ban poi sha ka thong, ka jinglong paralok bad ruh ban burom ïa ka jingïalehkai da ka lynti kaba khuid.
Namar ki don palat 500 ngut ki nongïashim bynta kiba la dep pynrung kyrteng, kumta la khmih lynti ruh ba kan don ka jingshim bynta kaba shitrhem da kaba pyni ïa ka mynsiem ïalehkai.
Ha kajuh ka por kum ka dak jong ka jingburom, baroh ki nongshim bynta kin ïoh ruh ïa ka jingai sngewbha da ka t-shirt.
Na ka liang u Myntri ka tnat ïalehkai ka Sorkar Jylla, u Bah Shakliar Warjri u la ong, “Ngi dap da ka jingkmen ban rakhe ïa kane ka Olympic Day bad kyntiew ïa ka mynsiem ïalehkai bad ka jingkilan met lyngba kane ka 4th Olympic Day Run ha Shillong. Kane ka jingïakob ym tang ba kan sei pyrthei ïa ki ’riew donsap ha kane ka jingïalehkai na kane ka jylla jong ngi, hynrei kan pynshlur ruh ïa ki nongshong shnong ban don ïa ka met kaba shait kaba khlaiñ. Nga ai ka jingïaroh ïa baroh ki nongshim bynta bad kitbok ruh ïa baroh ba kin ai ïa kaba bha tam ha kane ka jingïakob.”
Ïa kane ka jingïakob mareh yn kaweh ïa ka lama da u Bah Shakliar ha kaba yn ïadon lang ka Director ka tnat ïalehkai ka Kong Isawanda Laloo.
Ka lynti ba ki nongmareh kin hap ban mareh kan long kylleng ki bynta jong ka sor Shillong da kaba sdang na JN Stadium Gate No. 1, ter ter lyngba ka Ïew Polo, 4th Furlong, B.K. Bajoria Junction, B.K. Bajoria, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secretariat, DC Office, Governor House, Wards Lake, CM Bungalow, Polo Tower, bad Ïew Polo ha sha ba yn pynkut pat ha JN Stadium Gate No. 1.
Na ka bynta ki nongjop ha kane ka jingïakob la pynkhreh ïa ki khusnam da ki song pisa ha SSA Stadium ha ka por 7:30 mynstep.
